Flamurtari mund Goga Basket, rikthehet në krye të renditjes

Flamurtari del me fitore nga pallati i sportit "Dhimitraq Goga". Vlonjatët kanë mposhtur dje në mesditë, 58-53 Gogën vendase në një ndeshje mjaft të fortë. Rivaliteti i viteve të fundit mes këtyre dy ekipeve shoqëroi edhe takimin e djeshëm, por në fund është skuadra e trajnerit Viron Toska, që i gëzohet këtij triumfi. Siç edhe pritej, takimi nisi me shumë agresivitet dhe janë vendaset, që fillimisht luajnë më mirë. Skuadrat ishin përgatitur për të mos lejuar depërtimet respektive drejt koshit dhe kjo bëri që të ketë pak shenja spektakli e lojë të bukur. Me avantazhin +6 të Gogës, është mbyllur fraksioni i parë (19-13). Në të dytin reagon mirë Flamurtari, i cili luan me ritëm më të lartë. Rivaliteti shoqëron edhe këtë periodë, pasi pikët e Aliaj dhe Nikpaljeviç rikthejnë baraspeshën në pikë 21:21. Me një sulm pa rezultat të vendasve dhe baraspeshë totale është mbyllur dhe pjesa e parë e lojës (27-27). Me një trepikësh të vendasve ka nisur fraksioni i dytë i kësaj ndeshjeje finale, quajtur kështu për shkak të rivalitetit mes tyre. Loja bëhet gjithnjë edhe më e luftuar dhe luhet fort për çdo top. Hapësirat në mbrojtjet respektive mbyllen shpeshherë, duke bërë që loja deri diku të bëhet e bezdisshme dhe pa shumë pikë. Pas tri periodash lojë, rezultati fiksohet në 3943. Edhe 10 minutëshi i fundit zhvillohet me të njëjtin ritëm. Të dyja ekipet e duan fitoren, shohin nga sulmi, por të njëjtën rëndësi i japin edhe prapavijës. Pas 3 minutash lojë, rezultati shkon në 45-45. Rivaliteti vazhdon

dhe pas 6 minutave të para të këtij fraksioni, baraspesha është 51-51. Nikpaljeviç shënon një trepikësh për vlonjatet dhe këtu vjen kthesa e mikeshave. Nuk ka më kohë dhe lojtaret e Gogës tentojnë përmes trepikëshave për të përmbysur. Kjo, edhe sepse vlonjatet markojnë mirë dhe nuk lejojnë hapësira, duke bërë që fundi i ndeshjes t'u buzëqeshë atyre. Kështu Flamurtari ka fituar një ndeshje finale me një prej rivaleve direkte 58-53, ndaj Goga Basket. Një humbje që zbret ekipin e Gogës në vendin e dytë në renditje, me pikë të barabarta me Tiranën. Roland Gjini