Kombëtarja, Bufon përçan italianët
Tifozët kundër: Cikli i tij ka mbaruar, është koha për ndryshim
ntuziast, i motivuar dhe i emocionuar. Aventura e Xhixhi Di Biaxhos si trajner i ri i Italisë ka nisur, por jo në mënyrën më të mirë. Është pasardhës i Venturës për të sjellë frymë të re në skuadrën kombëtare, por deklarata e tij për të rikthyer Bufonin ka hapur një çështje në Itali. Shumë prej tifozëve mendojnë se senatori i Juventusit duhet ta mbyllë këtë kapitull, ndërsa të tjerë thonë se meriton një shans.
DI BIAXHO - Trajneri i përkohshëm i "axurrëve" thotë se ndeshja ndaj Suedisë nuk duhet të jetë e fundit për legjendën Bufon dhe ai e ka telefonuar për ta rikthyer për disa ndeshje miqësore. "Është normale që kam filluar të mendoj për muajt e ardhshëm. Kam pasur komunikim me më të vjetrit dhe me Bufonin. Për mua nuk është e drejtë që ta mbyllë aventurën si në ndeshjen me Suedinë. I thashë që të rikthehej për një, dy apo tri ndeshje. Pastaj të vendosë me ftohtësi se çfarë do të bëjë. Ai do të jetë grumbulluar, ndërsa Barzalji me De Rosin jo. Kielini gjithashtu do të jetë", ka thënë fillimisht Di Biaxho.
ZËRI KUNDËR - Në sondazhin e krijuar nga "Gazzetta Dello Sport" për rikthimin e Bufonit në kombëtare, shumica e votuesve mendojnë se vendimi i Di Biaxhos është i gabuar. Opsioni, "Jo. Cikli i tij ka përfunduar, është koha për të ndryshuar", ka marrë 80% të votave, ndërsa personat që mendojnë se nuk e meriton ta mbyllë karrierën pas eliminimit nga botërori janë 12%. Por, 8% e votuesve mendojnë se për 2-3 ndeshje miqësore nuk ka asgjë të keqe. Reagimi ka qenë i menjëhershëm në rrjetet sociale, ku tifozët mendojnë se rikthimi i Xhixhit do të jetë humbje kohe për kombëtaren.
ZOF - Legjenda e portës italiane Dino Zof nuk mban asnjë qëndrim për këtë çështje, por thotë se Bufon duhet të marrë sa më shpejt vendimin për të mos e lënë situatën evazive. "Nuk është gjë e mirë që situata të jetë e tillë, e pakuptueshme. Bufon duhet të dalë të deklarojë vendimin e tij në lidhje me rikthimin apo me rinovimin te Juventusi", thotë Zof.