Rio Ferdinand: Pogbasë duhet t’i bërtasësh
“Unë do t'i isha bërë makth, ashtu siç bënin Bufon, Bonuçi dhe Kielini te Juve”
ol Pogba po has vështirësi në sezonin e tij të dytë në "Old Trafford" mes dëmtimeve dhe problemeve taktike me trajnerin Zhoze Murinjo, të cilat, sipas spekulimeve, kanë rindezur edhe nostalgjinë e rikthimit te Juventusi, klub që e la në verën e 2016- ës për shifrën rekord të 105 milionë eurove. Por ish- qendërmbrojtësi i "djajve të kuq", Rio Ferdinand, përpiqet të shpjegojë situatën e mesfushorit francez dhe i jep një dush të ftohtë talentit të kombëtares franceze: "Mendoj se pozicioni në fushë është pjesa kryesore e problemit. Unë do t'i kisha ulëritur fort nëse do ta kisha pasur shok skuadre, do të isha shndërruar në makthin e tij, do ta kisha torturuar në çdo pjesë të fushës. Ai ka nevojë pikërisht për këtë dhe këtë e gjente te Juventusi. Duhet të qëndrojë në atë pjesë të fushës dhe të luajë me dëshirën për të mbrojtur skuadrën e tij. Te Juventusi kishte njerëz si Bonuçi, Kielini dhe Bufon pas që e bënin diçka të tillë. Te Mançester Junajtid ky komunikim mungon dhe nuk i kërkon askush llogari".
NEVIL - Ndërsa Geri Nevil, një tjetër ikonë e 20 herë kampionëve të Anglisë mendon se 24-vjeçari do të përfitojë nga eksperienca e këtyre problemeve të fundit për t'u përmirësuar: "Është e vështirë për Pol Pogbanë që të lihet jashtë formacionit në një ndeshje të madhe. Por unë isha 20 vite te Mançester Junajtid dhe kam parë shumë lojtarë të mëdhenj që janë lënë jashtë ndeshjeve të rëndësishme, ndonjëherë futbollistë ndoshta shumë më të mirë se Pol Pogba. Ne nuk duhet ta marrim si një fyerje. Ai duhet ta kapërdijë, ashtu siç bëjnë të gjithë futbollistët e mëdhenj, të gjithë karakteret e mëdhenj. Kur ata ulen në stol, atëherë luftojnë edhe më fort që të rikthehen në skuadër".