Grekët na bllokojnë talentet, ankohet trajneri i Kombëtares U-17
Shqiptarët Renild Kasemi e Andrea Ndoj, nuk i lejon Olimpiakosi
Trajneri i Kombëtares U-17, Xhemal Mustedanagiç, është ankuar dje për faktin se tre talente shqiptare që luajnë në klubet greke nuk janë lejuar të grumbullohen me ekipin kuqezi. Në konferencën për shtyp në prag të grumbullimit njëjavor, boshnjaku i pankinës U17 foli për planin që ka në prag të eliminatoreve. Mustedanagiç nuk i përmendi emrat e lojtarëve që janë bllokuar nga Olimpiakosi, por "Panorama Sport" zbulon se bëhet fjalë për mesfushorin Renild Kasemi, si dhe mbrojtësin Andrea Ndoj. Bëhet fjalë për dy lojtarë të talentuar. Trajneri Mustedanagiç publikoi listën me 23 lojtarë, mes të cilëve janë të pranishëm mbrojtësit Smajlaj i Fiorentinës, Llapi i Valencias apo Asllani i Empolit e Dajku i PAOKut. Në ekip bie në sy edhe prezenca e mesfushorëve Erik Troqe nga Milani, Dervishit të Atalantës e Papës nga AEK- u i Athinës dhe sulmuesit Krasniqi tëTotenhemit. Përfaqësuesja U17 nisi që dje grumbullimin në Durrës.
MUSTEDANAGIÇ
"Prej nëntorit të kaluar kemi nisur grumbullimet me turneun që morëm pjesë në Turqi, gjithashtu në janar të këtij viti zhvilluam një grumbullim të zgjeruar me 45 futbollistë dhe tre portierë. Ka qenë një punë mjaft e madhe, duke i parë së bashku lojtarët që luajnë jashtë vendit dhe ata të kampionatit shqiptar. Një problem të vazhdueshëm e kemi me ekipet greke, specifikisht me Olimpiakosin, ku luajnë tre elementë që premtojnë shumë, por nuk i lejuan të grumbulloheshin këtë herë. Shpresoj që ata t'i bashkohen ekipit në të ardhmen. Ky është grumbullimi i fundit seleksionues dhe, më pas, do të caktoj 23 elementët që do të përbëjnë grupin, ku natyrisht skuadrës do t'i bashkohen prurje të reja nëse bëhet fjalë për lojtarë shumë të talentuar", ka thënë fillimisht trajneri kuqezi. Pas grumbullimeve, Mustedanagiç do të nisë testimin e 17- vjeçarëve në ndeshje, duke nisur nga turneu që do të zhvillohet nga 19 deri më 24 prill në San Marino, ku kundërshtarë do të jenë edhe Italia e Armenia, për të vazhduar me miqësoret e muajit shtator me vendet fqinje, si Maqedonia, Mali i Zi ose Kosova. "Nëse edhe tre lojtarët e Olimpiakosit do t'i bashkohen ekipit tonë, mendoj që do të kemi një skuadër shumë të
fortë. Bëhet fjalë për një brez të talentuar. Në tetor nisin ndeshjet kualifikuese, takimi i parë është më datë 23 kundër Norvegjisë, në datën 26 luajmë me Sllovakinë, kundërshtar që shpresojmë të na sjellë sërish fat, sepse sllovakët i kishim për herë të fundit kundërshtar kur jemi kualifikuar. Ndeshja e fundit është ajo me Azerbajxhanin më datën 29 tetor". APELI PËR ARBITRAT
Në fjalën e tij para mediave, Mustedanagiç foli edhe për kujtimin e hidhur që ka nga eliminatoret e fundit. "Shpresoj që këtë herë të kemi gjykime të mira, pasi jemi dëmtuar nga gjykimi në fazën e eliminatoreve për këtë moshë. Një pikë
e mohuar kundër Kroacisë do të mjaftonte për ne të vazhdonim në Elite Raund. Kemi një brez të talentuar futbollistësh. Në kohën time mjaftonte vetëm talenti, ndërsa tani kërkohet më shumë se kaq. Duhen shumë cilësi, talenti është vetëm hapi i parë, duhen disiplina dhe karakteri për të vazhduar më tej. Mënyra ime e lojës është sulmuese, kjo varet dhe nga kundërshtari që do të kemi përballë. Pavarësisht se kë kemi pasur përballë, kemi pasur ekipe shumë të forta si Kroacia dhe Spanja. Ne kemi bërë futboll të bukur dhe dinjitoz. Në muajin tetor do të luajmë ndeshjet e para të eliminatoreve, shpresojmë që këtë herë të kualifikohemi".