Abazaj dhe Bregu në shënjestër, Luftëtari ngujohet në… parket
Talentet shpërdorojnë si në një lojë fëmijësh, zhgënjim në Gjirokastër
Nga 0-0 në Lushnjë, te 2-2 në Laç dhe së fundmi sërish barazim në Gjirokastër ndaj Vllaznisë, por pa gola. Luftëtari mund dhe duhet të kishte të paktën gjashtë pikë më shumë në tabelën e klasifikimit, gjithnjë duke iu referuar vetëm pesë ndeshjeve të fundit, ku bluzinjtë kanë marrë dy fitore dhe tri barazime. Në "Roza Haxhiu" shpërdoroi pa fund Kristal Abazaj, ndërsa më pas në Laç protagonist i rasteve të humbur u bë Dejvi Bregu. Kulmi arriti ndaj shkodranëve, ku dy yjet e Luftëtarit nuk shënuan nga pozicione ideale. Të dy humbën raste të pabesueshme, duke zhgënjyer jo pak tifozët, të cilët natyrshëm presin shumë nga talentet. Edhe drejtuesit, pavarësisht se nuk kanë dashur të prononcohen, janë të pakënaqur nga mënyra se si Abazaj dhe Bregu kanë bërë në ndeshjet e fundit. Tani më shumë se kurrë duhen pikët. MOTI - Stuhia "siberiane" duket se ka prekur edhe Gjirokastrën ditën e djeshme. Do të mjaftonte intensiteti i shiut, si dhe temperaturat e ulëta për të ngujuar Luftëtarin në pallatin e sportit për t'u dhënë jetë përgatitjeve anti-Flamurtar. Rikthimi i katër titullarëve në përballjen me Flamurtarin, që do të luhet të enjten për trajnerin Lika, pa dyshim që e bëjnë më të lehtë formatimin e 11-shit. MBROJTËSI - Aurel Demo, 21vjeçari kuçovar i ardhur në merkaton e janarit nga Panejalio, skuadër e Kategorisë së Dytë të kampionatit grek, me paraqitjen pozitive në takimin me Vllazninë, konfirmohet si një ndër prurjet më cilësore në radhët e bluzinjve, përpos gabimit të minutës së 37-të. Më shumë se i ndrojtur dhe për më shumë me modestinë e futbollistit të rritur jashtë Shqipërisë, për "Panorama Sport", Demo lidhur me paraqitjen e parë si titullar me fanellën e Luftëtarit, u shpreh: "Me aktivizimin si lojtar titullar në përballjen me Vllazninë, nuk jam i kënaqur. Më vjen keq në episodin e minutës së 37-të. Nuk mbetem i kënaqur me prezantimin tim të parë në ndeshjen e kampionatit, përkundrazi, mendoj dhe besoj te cilësitë e mia individuale se më duhet të jap më shumë se 100% të aftësive të mia. Me besimin e stafit teknik, veçanërisht të trajnerit Lika për të cilin gjej rastin ta falënderoj për aktivizimin me fanellën me peshë të rëndë të Luftëtarit dhe jam i gatshëm të luaj si mbrojtës krahu apo edhe qendre", tha Demo. Tomor Shehu