Shkodra: Pakult mat sekondat, Partizani më kërkoi dy herë

Mesfushori tregon eksperiencën me verilindorët

Donjet Shkodra është një nga emrat e njohur në Kategorinë Superiore, ku pas një paraqitje të mirë me Flamurtarin u transferua te Skënderbeu ku nuk arriti të gjente shumë hapësira dhe tani është pjesë e Kukësit. I ftuar te "Rubrika Sportive" në RTSH, ai ka folur për eksperiencën te korçarët dhe jo vetëm. "Te Skënderbeu nuk arrita të ambientohesha siç duhet, edhe pse transferimi im atje ishte me bujë. Kam bërë vetëm dy javë përgatitje dhe kjo nuk mjaftoi. Më pas kanë nisur ndeshjet e Europës dhe Skënderbeu është një skuadër e madhe, ka lojtarë shumë cilësorë dhe ndryshimi i formacionit ishte pak i vështirë. Ndoshta po të kishte më shumë ndeshje, ambientimi im në skuadër do të ishte më i shpejtë, por futbolli është i tillë", ka thënë mesfushori, i cili e sheh të vështirë garën për titullin kampion. "Si futbollist duhet që gjithmonë të besosh, pasi nëse nuk e bën nuk arrin dot të fitosh ndeshje. Mendoj se është e vështirë, por deri në fund do të shohim se çfarë do të ndodhë", ishin fjalët e Shkodrës. Kosovari ka zbardhur edhe një pjesë të prapaskenave të merkatos. "Kam qenë në bisedime me Partizanin, si në merkaton e verës, ashtu edhe në atë të dimrit, por asnjëherë nuk u arrit asgjë. Disa gjëra në futboll të bëjnë të mendohesh dhe akordi ishte me një tjetër skuadër", ka sqaruar Shkodra. KUKËSI - Futbollisti ka folur edhe për Kukësin dhe përshtatjen e trajneri Pakult në vendin tonë. "I ka marrë pozitivisht këto çudirat shqiptare. Është një njeri që në radhë të parë ka disiplinën dhe një gjë të tillë e kemi konstatuar gjatë fazës përgatitore, ku jemi zgjuar që në orën 7 të mëngjesit. Normalisht që në momentet e para kemi qenë të lodhur, por më pas jemi ambientuar edhe me disiplinën në sekonda. Është një trajner që të motivon edhe kur humbet. Personalisht po luaj në një pozicion disi ndryshe, por po mundohem të përshtatem. Jam larg portës dhe kur marr topin më vijnë dy kundërshtarë. Gjithsesi shpresoj që golat të vijnë shpejt", ka mbyllur Shkodra.