Mungesa e Malotës vë në alarm Vllazninë, “përzihen” kartat
"Kopje" skemës së Cungut, ekipi në palestër
Përveç humbjes në Laç, Vllaznia do të ketë edhe mungesa në përballjen e së hënës ndaj Flamurtarit. Mbrojtësi i qendrës Renato Malota do të jetë një mungesë e sigurt në këtë takim. Ai është ndëshkuar me karton në momentin e protestës së golit të kurbinasve, pikërisht tek anësori që lejoi vazhdimin e lojës pas faullit të shkaktuar ndaj Mersinit. Ky karton ka qenë i dyti i tij me fanellën e Vllaznisë, por mbrojtësi ka pasur edhe dy të tjerë që nga periudha kur luante me Partizanin. Në këtë mënyrë, ai ka plotësuar numrin 4 të tyre dhe prandaj do të jetë i pezulluar ndaj Flamurtarit. Një mungesë shumë e rëndësishme sepse me praninë e tij në fushë, u kishte dhuruar qetësinë kuqebluve në mbrojtje. Kjo edhe për faktin se dihet që Vllaznia nuk ka shumë alternativa në këtë repart. Edhe Pjeshka, që mund të luajë në atë pozicion, ende nuk është rikuperuar plotësisht nga dëmtimi. Ai ka qenë në takimin me Laçin, pjesë e stolit shkodran, megjithatë nuk dihet nëse është plotësisht i gatshëm për të qenë nga minuta e parë në fushë për këtë takim. Nisur nga kjo, nuk përjashtohet mundësia që tekniku të bëjë përzgjedhjen që ka bërë ish-tekniku Armando Cungu, ku në qendër të këtij reparti pritet të rikthejë sërish Orelesin. Gjithsesi ka edhe pak ditë në dispozicion për të vendosur për lëvizjen e mundshme në këtë repart. Ndërsa ende nuk dihet nëse për këtë përballje do të jenë të mundshëm dyshja Bardulla e Marku, të cilët vuajnë ende dëmtimet.
Problemi - Përveç mungesave, Vllaznia po vuan këto ditë një tjetër problem. Për ta është pa dyshim pamundësia për t'u stërvitur në një ambient të hapur. Kushtet e vështira atmosferike e kanë detyruar ekipin që edhe ditën e djeshme të mbyllet në palestër. Ky pa dyshim që është një shqetësim për stafin teknik sepse ndeshja me Flamurtarin po afron dhe skuadra duhet të bëhet gati, duke qenë se kemi të bëjmë me një takim ku patjetër duhet kërkuar fitorja. Moti i ftohtë dhe me reshje dëbore e shiu pritet që të shoqërojë edhe këto ditë qytetin verior.