Gjici “shkund” Kukësin
Kushti i numrit një të klubit, Lushnja dhe Teuta shmangin furtunën
Kukësi barazoi ndaj Skënderbeut në sh tëpi, në një ndeshje që duhet medoemos ta fitonte, aq më tepër duke qenë në avantazh 2- 0. Duke parë lojën dhe rastet e shumta për të shënuar, verilindorët kanë mbetur shumë të zhgënjyer nga ai barazim. Jo vetëm kaq, por edhe për faktorë të tjerë si mungesat e shumta të korçarëve, apo edhe faktin që terreni i rënduar ishte diçka e pazakontë, sidomos për skuadrën korçare, e cila në fizionominë e saj ka lojën me topin e shtruar dhe pasimet e shumta.
SITUATA
Barazimi ndaj Skënderbeut, për vetë ecurinë e këtij edicioni, sigurisht që mund të konsiderohet pozitiv. Mirëpo, jo në rrethanat e ndeshjes së fundit në "Zeqir Ymeri". Dy pikët e humbura do të thonë shumë për kampionët, pasi gara me Flamurtarin është shumë e fortë. Stafi, futbollistët, tifozët e Kukësit, kanë qenë shumë të mërzitur nga ky barazim, por më shumë e ka përjetuar presidenti Gjici, ai i cili investon në këtë ekip dhe priste nga skuadra tri pikët, me qëllim që të hapej kampionati e diferenca të ngushtohej. Kreu i klubit është larguar nga stadiumi shumë i mërzitur nga vetë mënyra si shkoi ndeshja, ku Kukësi
nuk diti të administrojë avantazhin e dy golave, e duke mos shfrytëzuar rastet e shumta për shënim që realizuan. Në fund të ndeshjes, numri një i klubit e shmangu komunikimin me ekipin për ta bërë atë në një moment të dytë, kur edhe
opinioni të ishte më i zhveshur nga emocionet e pasndeshjes. MBLEDHJA
Pikërisht për ndeshjen e fundit, dje ka pasur një takim mes të gjithë skuadrës, që nga numri një i klubit, stafi dhe skuadra. Gjatë paradites së djeshme, stafi drejtues dhe skuadra kanë zhvilluar një mbledhje me presidentin përpara seancës stërvitore për të biseduar, pikërisht për sfidën e fundit përballë korçarëve. Gazeta mëson se presidenti Gjici ua ka shprehur në mënyrë të drejtpërdrejtë zhgënjimin e tij. Për të mos përsëritur një të tillë paraqitje, ai u ka kërkuar dy fitore radhazi: ndaj Lushnjës dhe Teutës. Ky është kusht nga presidenti, pasi Kukësi duhet medoemos të arrijë vendin e dytë shumë shpejt, në të kundërt do të nisin edhe penalitetet që kanë të bëjnë me pagesat e skuadrës. Gjici njihet si një person shumë korrekt në pagesa, madje para fitores me Laçin, ai dha urdhër për shpërndarjen e rrogave plus një premio surprizë prej 10 milionë lekë të vjetër. Ama, kur ecuria nuk është e mirë, presidenti Gjici nuk toleron. Kujtojmë se muajin nëntor ekipi i Kukësit mbeti pa rroga, pasi u penalizua nga rezultatet e këqija të asaj periudhe të skuadrës kampione në fuqi. Ndaj, 6 pikë në dy ndeshje janë kusht për ekipin kuksian për të shmangur… furtunën.