Letra prekëse e legjendës korçare, Vaso: Po jetoj me 170 euro në muaj

Legjenda e futbollit korçar dhe e Kombëtares, Teodor Vaso, nëpërmjet një shkrimi në "Facebook", ka bërë publike kushtet e vështira të jetesës dhe problemet e shumta. Vaso tregon se jeton me një pension prej 170 eurosh, një shifër që është e papërfillshme për një ishlojtar të Kombëtares. Ish-mbrojtësi flet për padrejtësitë që janë bërë ndaj tij ndër vite.

POSTIMI i TEODOR VASOS

"Të nderuar dashamirësit e mi, të nderuar qytetarë dhe sportdashës! Jam i detyruar që pas shumë vitesh t'ju paraqes ju për njohje ndodhitë dhe problemet e mëposhtme. Jetoj me pension 170 euro sepse në vitin 1996, si arsimtar me shkollë të lartë, më pushuan nga puna pa asnjë motivacion dhe pensioni më doli më i ulët se kolegët e mi trajnerë dhe mësues. Bëj të ditur që jam i vetmi në Shqipëri si mësues dhe trajner me 46 ndeshje ndërkombëtare, 20 prej tyre me ekipin kombëtar, që marr këtë pension. Me vendim të Këshillit të Ministrave, që del çdo vit, u është akorduar pension i veçantë shumë bashkëkolegeve të mi. Dokumentet për këtë çështje paraqiten në këshillin e qarkut të çdo qyteti përkatës.

Dokumentet e noterizuara duhet të vërtetojnë meritat e veçanta si tituj, medalje etj. Ju lutem dashamirësve të lexojnë me kujdes kalvarin e një historie të pabesueshme, jo për akordimin e pensionit, por për mënyrën antizyrtare që është ndjekur për një figurë sportive kombëtare të nivelit ndërkombëtar.

Para pak kohësh, kryetarja e qarkut të Korçës, Irena Nika, nuk denjoi të pranonte dokumentet përkatëse, megjithëse e kishte dhe është detyrim zyrtar. Tha që kam 300 të tilla. Me rastin e 100-vjetorit të shoqërisë 'Vëllazëria', Këshilli i Bashkisë Korçë aprovoi për 26 personalitete të sportit korçar "EMBLEMA E ARTE E QYTETIT". Klubi shumësportësh, në foton e publikuar për medaljen në fjalë, nxori 21 personalitete.

Më pas, nga fotoja në muzeun e klubit, e hoqi foton e Teodor Vasos, duke e retushuar me të trajnerit të volejbollit, Pandi Gëllçi, me merita të veçanta, megjithëse komisioni i klubit nuk e kishte propozuar. Në vendimin e Këshillit të Qarkut, me medaljet që nuk janë në foto, janë dhe Ilia Teneqexhi, Jovan Melka, Sotiraq Dhamonica, Artur Kreka, Rafail Dishnica. Retushimi vazhdoi me veprime të tjera, duke mos lajmëruar kur personalitete shtetërore kanë bërë takim me sportistë. I tillë ishte dhe kur ish-presidenti Bamir Topi bëri takim e ndau tituj në një rast feste dhe pyeti: "Ku e keni T. VASON', e i thanë se është lajmëruar, por nuk ka ardhur. Për këto e të tjera si këto, kam vazhduar që t'i bëj prezente tek autoritetet përkatëse, por nuk marr përgjigje. Kështu, Emblemën e Artë me vendimin e Këshillit të Bashkisë, e heq nëpunësja Tatjana Marashi sikur të jetë vetë këshilli bashkiak. Meqenëse shumë dashamirës apo sportdashës nuk kanë njohje, duhet ta bëj të ditur. Sipas vlerave që duhet të kenë kërkuesit apo ato që emërtesat i kërkojnë për merita të veçanta po e cilësoj: 'Jam njëri nga 5 sportistët më të mirë të vitit 1968 në përbërje të ekipit Kombëtar të futbollit shqiptar për rezultatin e jashtëzakonshëm në barazimin 00 me kampionen e botës, RF Gjermane'. Në 17.12.1967 jam cilësuar ndër 11 më të mirët të futbollit shqiptar, në 55-vjetorin e futbollit tonë, të botuar në gazetë. Jam cilësuar futbollist i shekullit të Korçës në vitin 1998.

Po këtë vit jam dekoruar me 'Medaljen e Artë' për merita të shquara nga Ministria e Arsimit dhe Sportit më 1998. Këshilli Bashkiak i Korçës, me vendimin e tij, me akordoi 'EMBLEMA E ARTË E QYTETIT'. Kam bërë 46 ndeshje ndërkombëtare, nga këto 20 me ekipin përfaqësues (Kombëtaren), si lojtari me më shumë ndeshje të futbollistëve korçarë, sipas statistikave zyrtare të botuara. Me respekt dhe nderime".

Gjatë karrierës së tij, legjenda korçare, është aktivizuar 18 ndeshje me Kombëtaren kuqezi, 3 me Skënderbeun dhe 15 me Partizanin. Teodor Vaso ka shënuar 26 gola, edhe pse roli i tij ka qenë qendërmbrojtës.