Ka grumbulluar 10 pikë në 23 ndeshje, Lushnja si Benevento dhe Platanias
Myzeqarët nuk janë të vetëm në Europë me bilanc negativ
Në transfertën me të kuqtë, Lushnja pësoi humbjen më të thellë në kampionat. Për herë të fundit, një humbje me këto shifra ishte regjistruar 12 vjet më parë, kur në 18 mars 2006, lushnjarët humbisnin 0-6 ndaj Besës, në Kavajë. Por, ky sezon i superiores është më i dobëti në shifra për myzeqarët, që kanë grumbulluar vetëm 10 pikë në 23 ndeshje, me një mesatare 0.4 pikë për ndeshje. Gjithsesi, myzeqarët nuk janë të vetmit në Europë. Në kampionatin italian, Benevento ka 10 pikë në 26 ndeshje. Për sa i përket Ballkanit, në kampionatin grek
Platanias ka 10 pikë në 23 ndeshje. Ndërsa në kampionatin bullgar, Vitosha Bistritsa ka vetëm 5 pikë në 22 ndeshje. Trajneri - Humbja me Partizanin ishte e katërta radhazi për verdhëjeshilët, të cilët janë e vetmja skuadër e superiores, që nuk kanë marrë pikë në
fazën e tretë të kampionatit. Tashmë Lushnja ka diferenca të thella me skuadrat e tjera dhe mendon t'i bëjë një mbyllje dinjitoze kampionatit, që humbje me shifra të thella si ajo e së mërkurës me Partizanin, të mos përsëriten më. Trajneri i Lushnjës, Dritan Çuko,
për gazetën "Panorama Sport", u shpreh: "Ekipit i kam dhënë një ditë pushim (të enjten), për arsyen e ngarkesave që ka pasur në këto ndeshje. Plus gjendjes së rënduar gripale, por edhe gjendjes së rënduar të terreneve nga ngricat. Do të shikojmë gjendjen e ekipit dhe do të kemi një analizë për ndeshjen me Partizanin. Do t'i kërkoj të gjithë sportistëve që të futen për të luajtur mirë futboll. Të motivohen më shumë dhe të japin maksimumin e tyre. Ditët në vazhdim do të provojmë një alternativë tjetër, do të shikojmë një mënyrë tjetër. Për
të përgatitur ndeshjen me Kukësin, do të shikojmë gjendjen e fushave ku të jetë më mirë për ekipin për t'u stërvitur. Nëse këta lojtarë që kemi do të vazhdojnë të mos motivohen, do të shikojmë alternativat më të mira që kemi", u shpreh Çuko. Alban Alushi