Sentamu-Ngoo, kur “divorci” sjell ndalesën e Tiranës

Kur nuk luajnë bashkë, ekipi i Ze Marias...ngec

Tirana, që dikur vuante për një sulmues, këtë vit ka dy të tillë. Për shumëkënd kjo kategori nuk shërben ndoshta si barometër për vlerat e një lojtari, megjithatë duhet thënë që shifrat flasin për një ekip, që ndjeshëm e ka ndrequr problemin e golit. Plot 42 herë e kanë dërguar topin në rrjetë, duke dëshmuar se janë një "makineri" golash. Dhe gjysmat e tyre mbajnë "firmën" e sulmuesve kryesorë: Majkëll Ngoo dhe Junus Sentamu. Anglezi e ka nxjerrë 9 herë topin nga rrjeta, ndërsa ugandezi plot 11, duke qenë edhe kandidat potencial për kreun e golashënuesve të së Parës. Edhe pse luajnë për të parën herë së bashku, duhet thënë që kanë një "kimi" gati-gati perfekte mes tyre. Jo vetëm që e njohin mirë kuadratin, por nuk janë të pakta rastet kur plotësojnë njeritjetrin me anë të asisteve. Thënë ndryshe, Ngoo-Sentamu mund të konsiderohet edhe si "binomi" i suksesit të kryeqytetasit. Dhe mjaftoi 90 minutëshi i fundit për ta kuptuar këtë. Në një prej ndeshjeve më të rëndësishme të sezonit, atë që luajtën në Fier kundër Apolonisë, Ze Maria vendosi që të kursente afrikanin dhe në fushë hodhi

vetëm gjigantin anglez si titullar. Madje, ndërrimin e tyre e bëri kokë më kokë. Dhe për çudi, skuadra jo vetëm që nuk fitoi, por as nuk shënoi gol. Dashur pa dashur, lind pyetja, mos ndoshta "divorci" i tyre sjell ndalesën e bardhebluve? Shifrat thonë që "po", pasi kur janë

bashkë në fushë, edhe nëse nuk bëjnë gola, skuadra merr pikët e plota.

STATISTIKAT - Vetëm në 4 përballje kanë arritur që të festojnë që të dy për golat e shënuar dhe duhet thënë që në të gjitha rastet Tirana ka shpërthyer, mjafton të përmendim ndeshjet kundër Pogradecit, të fituara 3-0 në transfertë dhe 60 në shtëpi. Me të njëjtin rezultat ia dolën edhe në Peqin, ndërsa në Kuçovë bën "poker". Por të shohësh ecurinë e tyre deri në javën e 17-të, duhet thënë që Ngoo ka realizuar në 8 ndeshje në total (një dygolësh), ndërsa Sentamu në 7 (mes tyre një tripletë dhe dy dopieta). Edhe në ndeshjen e nesërme janë të detyruar që të bëjnë pa tjetrin, por këtë herë jo për zgjedhje të trajnerit, por prej kartonëve. Anglezi ka plotësuar numrin 4 të të verdhëve, ndaj pesha e sulmit tashmë i mbetet e gjitha Sentamusë.