"Lojtari kishte alergji, është i pafajshëm"
Klubi i Skënderbeut ka dalë dje me një reagim zyrtar mbi çështjen "Jashanica". Sipas asaj që raporton zyra për shtyp, mbrojtësi ka pasur alergji në ditën e ndeshjes Skënderbeu-Jang Bojs 1-1, zhvilluar më 28 shtator 2017, në "Elbasan Arena". Klubi bën të ditur se substanca prednizolut që ka përdorur Jashanica, është një medikament i përdorur gjerësisht në trajtimin e alergjive. "Përmes kësaj deklarate për shtyp, Klubi i Futbollit Skënderbeu informon sportdashësit dhe median në lidhje me procedimin disiplinor ndaj lojtarit tonë, Bajram Jashanica, për kundravajtjen e ' përdorimit të substancave dopuese'. Më datë 28 shtator 2017, Bajram Jashanica është diagnostikuar me simptoma të alergjisë akute, e cila kishte nevojë për një trajtim të menjëhershëm dhe efektiv. Në përpjesëtim me kushtet klinike të lojtarit, atij i është administruar substanca e prednizolut, medikament i përdorur gjerësisht në trajtimin e alergjive, prej me shumë se 50 vitesh. Menjëherë pas përfundimit të ndeshjes, stafi mjekësor kërkoi lëshimin e një autorizimi të përdorimit të substancës prednizolone nga Komisioni i Antidopingut të UEFA- s, e njohur edhe si Autorizimi TUE, pasi kjo substancë ishte administruar në kushtet e urgjencës dhe në mirëbesim të plotë nga ana e lojtarit. Pavarësisht kërkesës së arsyetuar nga ana e klubit tonë, organi administrativ i UEFA-s refuzoi lëshimin e autorizimit dhe si pasojë, ka çelur procedurë disiplinore. Bëjmë me dije se substanca në fjalë është vetëm e ndaluar si rrjedhojë e metodës së administrimit të saj ( injeksion), pasi preparate të ngjashme, të administrueshme në rrugë orale ( pilula) nuk konsiderohen si forma dopingu dhe veçanërisht janë të klasifikuara në kategoritë më të ulëta të dopingut, për nga rrezikshmëria dhe efektet e tyre. Klubi i Futbollit Skënderbeu është i bindur në pafajësinë e plotë të Jashanicës dhe do të përdorë çdo resurs të mundshëm në mbrojtjen e integritetit dhe karrierës së tij. Faleminderit për mirëkuptimin", citohej ndër të tjera në reagimin e klubit korçar për daljen pozitiv të Jashanicës në testin antidoping.