Sa përgjegjësi ka Romela dhe pse s'e thotë hapur fajtorin?!

Romela ka të drejtën e saj të dalë në konferencë për të shpjeguar situatën, por në daljen e saj ditën e djeshme ajo nuk iu përgjigj disa pikëpyetjeve dhe disa gjërave thelbësore. Peshëngritësja nuk tha se kush ia bën këtë gjë, ia bëjnë ndërkombëtarët apo shqiptarët. Ajo akuzon palët e tjera, por nuk e thotë konkretisht cilat. Së dyti, si ka mundësi që një sportiste del pozitive për rast të përsëritur dhe nuk ka marrë masat për të mos përdorur sërish të njëjtin medikament. Së treti, a mjafton thjesht të vendosësh dorën mbi Kuran dhe mbi flamur për të vërtetuar pafajësinë. Nëse do të ishte kështu, atëherë do të funksiononte kaq lehtë edhe në federatat e tjera. Por nuk mund të marrim të mirëqenë faktin se Romela Begaj apo peshëngritësit e tjerë dënohen për faktin se janë shqiptarë. Historia ka treguar se ky fenomen është i ndëshkueshëm për të gjithë. Janë dhjetëra dhe qindra sportistë rusë, që janë pezulluar dhe ndëshkuar për shkak të dopingut, afganë, ukrainas dhe të gjithë me radhë. Por Romela vetë. sa përgjegjësi ka për kontrollet që bën dhe medikamentet që përdor, duke qenë se sipas saj, këto gabime ndoshta i drejtohen shtetit apo mjekëve. Por, sa e pastër dhe e ndershme është të thuhet se nuk ka përdorur doping kur ky nuk është rasti i parë. Përgjegjësitë u takojnë të gjithëve në këtë rast dhe Romelës gjithashtu, por mbi të gjitha nëse ajo e ndien veten viktimë në këtë situatë, pse nuk e thotë me zë të lartë se cilët janë fajtorët e vërtetë të këtij kaosi që ka përfshirë peshëngritjen shqiptare dhe jo vetëm.