Burreli luan në Pezë, Shkumbini llogarit vetëm fitore ndaj Naftëtarit
Fusha në kushte të vështira, Pogradeci nuk ka më objektiva
Ndeshjen e fundit të fazës së dytë, Burreli do ta luajë në Pezë. Takimi i sotëm ndaj Vllaznisë B do të duhej të luhej në Burrel, por, për shkak të kushteve të vështira atmosferike, është vendosur që takimi të luhet në një prej fushave në kompleksin "Pezë-Helmës" në Tiranë. Deri të enjten, kjo fushë kishte dëborë dhe nisja e reshjeve të shiut të premten në mëngjes e kanë vështirësuar së tepërmi terrenin. Për të parë nga afër fushën e stadiumit, dje ishin edhe specialistët e FSHF-së, të cilët kanë vendosur që ky takim të mos luhet në këtë fushë. Një vendim i tillë është marrë për të mos prishur garën, duke qenë se pas ndeshjeve të sotme do të bëhet ndarja e grupeve dhe do të zbardhet kalendari për fazën e tretë. SHKUMBINI-NAFTËTARI Shkumbini do të presë sot në fushën e vet skuadrën e Naftëtarit në një sfidë mes rivalësh direkt për mbijetesë, kjo pasi të dyja ekipet ndajnë vendet e parafundit dhe të fundit në renditjen e grupit të jugut. Për trajnerin Sokol Branica, kundërshtari ka marrë vlerësimin e duhur. "Mendoj se, pavarësisht pozicioneve që mbajmë në klasifikim, qoftë ne apo edhe rivalët e tjerë, në fazën e tretë lufta për mbijetesë do të jetë e hapur deri në fund. Pra, me përgjysmimin e pikëve, distancat e pikëve bëhen më të vogla dhe aty do të shihet lufta e vërtetë. Ndaj Naftëtarit duam me çdo kusht që të marrim pikët e plota". Ndërsa kuçovarët do të kërkojnë të mbyllin fazën e dytë me një rezultat pozitiv. Pritet me jo pak interes faza e tretë, ku do të ketë dhe përgjysmim të pikëve, në të cilën duket se kuçovarët, edhe pse në fundin e renditjes, favorizohen jo pak nga formula e kampionatit. TURBINA-POGRADECI
Në Cërrik, Turbina do të kërkojë fitoren përballë Pogradecit që e ka siguruar tashmë 5-shen e parë dhe nuk ka më objektiva. Trajneri Sinan Bardhi nuk do ta ketë të plotë grupin në përballjen me liqenorët, pasi nigeriani Ejoh dhe sulmuesi Çota janë të skualifikuar për shkak kartonësh. Ndërsa tekniku i Pogradecit, Festim Fetollari, tha se skuadra e tij do të respektojë garën deri në fund. D.Kurti/ F.Ahmeti/ A.Çepani/
F.Manari/ R.Xinxifi