Apolonia nën presion, sfidë kundër... dyshimeve

Trajneri Kashami: Nuk flemë, ndalim çdo ekip

Ndizet atmosfera, është java finale për verdiktin fundor në renditjen provizore të Kategorisë së Parë. Në grupin B të kësaj kategorie, beteja është po kaq e ndezur edhe për kreun e tabelës, atje ku Bylis "po e kërcënon" hapur Tiranën me ecurinë e javëve të fundit: vetëm 2 pikë më pak, që konvertohen në vetëm -1 pikë me startimin e fazës së tretë. Në Ballsh pritet më tepër rivalitet e luftë sportive, për vetë performancën që kanë treguar këto dy skuadra gjatë këtij sezoni: Bylis e dyta dhe Apolonia e treta në renditje. Të dyja skuadrat kanë shumë arsye për të bindur publikun dhe opinionin sportiv: Bylis, për të dëshmuar se nuk ka fituar më kot me Tiranën fazën e parë, se bardheblutë ankohen kot për gjyqtarin në barazimin 1-1 në Ballsh, se Bylis ka fituar me meritë javën e fundit në Kuçovë dhe se do ta tregojë veten edhe ndaj Apolonisë. Fierakët, për të dhënë provë të qëndrueshme se dyshimet ndaj Turbinës ishin hamendësi, se fitoi me meritë në Berat dhe se nuk ka qenë rastësi barazimi me Tiranën në një ndeshje gati 100 minuta lojë, se është i vetmi ekip që ka fituar ndaj Bylisit këtë edicion dhe është gati të dëshmojë dhe në "Adush Muça" se kjo Apoloni luan ndershëm, larg çdo pazari e pa qenë aleate e askujt.

KASHAMI - Trajneri i Apolonisë, Ndriçim Kashami

shprehet: "Do të kemi përballë një nga dy skuadrat më të mira të grupit, Bylisin, ekip me synime të qarta për në Superiore. Është një kundërshtar gjithmonë pretendues dhe ne e vlerësojmë plot respekt. Më shqetëson Apolonia sepse ne duam që të lëmë gjurmët tona

në këtë kampionat. Nuk jemi ekip që 'do flemë gjumë' ngaqë siguruam mbijetesën dhe 5shen e parë. Të japim maksimumin në çdo ndeshje, ky është karakteri ynë sportiv, mentaliteti, tipologjia dhe lajtmotivi i skuadrës, për të cilën unë kam punuar".