Luiza Gega nuk ia del të kualifikohet në finale

Atletikë-Botërori / E vetmja nga Shqipëria në Botërorin e Atletikës, e 17-ta mes 25 garueseve

Këtë të enjte ka nisur Botërori i 17të i Atletikës për salla të mbyllura, që zhvillohet në Birmingam të Anglisë. Rreth 600 atletë nga 150 vende të ndryshme kanë nisur të garojnë në "Birmingham Arena" për 4 ditë me radhë, deri ditën e diel, kur do të zhvillohen disa nga finalet kryesore. Shqipëria është përfaqësuar me vetëm një sportiste, Luiza Gega, e cila mori pjesë në garën e 1.500 metrave. Kjo kategori u zhvillua dje në mbrëmje në orën 19:42 (sipas orës lokale), në ditën e dytë të këtij Botërori. Atletja jonë, Luiza Gega, nuk ka mundur që të kualifikohej për në fazën finale, pasi ajo është e renditur e 17-ta, me kohën 4':10.65". Ky është një rezultat jo pozitiv dhe nuk pritej nga kjo garuese. Në këtë garë morën pjesë gjithsej 25 sportistë dhe e para doli Sifanb Hasan e Holandës me kohën 4':05.46". Në vendin e dytë u rendit afrikania nga Kenia, Uajni Shebet, me kohën 4':05.81, ndërsa e treta u rendit marokenia Rababe Arafi me kohën 4':06.12. Për sa i përket kampionit tjetër të Ballkanit, Izmir Smajlaj, ai në këtë Botëror ishte vetëm një i ftuar si shikues, pasi është tërhequr nga gara për të ruajtur fizikun e tij, që, sipas mjekut, ka nevojë për pushim. Ai pretendon të jetë gati për Lojërat Mesdhetare që do të zhvillohen në Terragona të Spanjës, në muajin qershor, e më pas për Kampionatin Europian, që do të zhvillohet në muajin gusht, ku do të përpiqet që të ruajë titullin që mban, edhe pse ky Europian i Berlinit nuk do të jetë më në salla të mbyllura.

Sa i përket Botërorit të Birmingamit, përfitimet financiare do të jenë në shifra shumë të larta, duke filluar nga 2 milionë dollarë, që janë në dispozicion të fituesve të 6 kategorive të ndryshme, për të kaluar te 20 mijë dollarët për vendin e dytë, 10 mijë dollarë për vendin e tretë, 8.000 dollarë për vendin e katërt, 6.000 për të pestin dhe 4.000 dollarë për vendin e gjashtë. Për çdo atlet që do të arrijë të thyejë një rekord, do të ketë dhe një shtesë prej 50 mijë dollarësh bonus. Kampionati Botëror përfundon të dielën me garat finale.