“Degradim, ndarje edhe te pagesat”

Blendi Shkëmbi befasoi jo pak me deklaratat e tij në fund të ndeshjes së fituar nga Liria e tij këtë fundjavë. Për të sqaruar më mirë situatën te klubi prizrenas dhe deklaratat e tij të fundit, trajneri i Lirisë, Blendi Shkëmbi, ishte i ftuar në një lidhje direkt me emisionin "Zona Gol", në "SuperSport". "Do ta krahasoja me Lacion për ecurinë, por jemi ende larg bardhekaltërve", tha ai. Ndryshimi- "Ndryshimi i parë lidhet me stadiumet dhe fushat e stërvitjes. Kampionati shqiptar, përfshi trajnerët dhe futbollistët, është disa vite para kampionatit kosovar, pasi në Shqipëri ka më shumë profesionalizëm. Gjithsesi, mund të them se në Kosovë shoh një dëshirë më të madhe për t'u përmirësuar dhe shumë shpejt do të rritet shumë rivaliteti edhe këtu".

Kritikat- "Nuk duhet t'i japim rëndësi asaj deklarate, pasi në Kosovë janë 12 skuadra në Superligë dhe 9 janë trajnerë kosovarë e 3 shqiptarë. Nga ata 9, vetëm njëri ka shprehur këto kundërshti, ndaj nuk ia vlen t'i japim rëndësi. Si unë, ashtu edhe Josa e Magani, kemi ndierë mbështetjen dhe ngrohtësinë e kolegëve kosovarë".

Situata- "Është Mirsat Çollaku, që më bëri ftesë për t'u bërë pjesë e Lirisë dhe më konfirmoi se objektivi është që të ndërtohet një skuadër e fortë dhe profesioniste. Kam afruar disa lojtarë shqiptarë, por ka edhe lojtarë maqedonas apo kosovarë, të cilët i kam afruar unë. Para një muaji, Çollaku ka dhënë dorëheqjen dhe tani është i komanduar një president tjetër". Pa pasaportë- "Me kryesinë e re kam dëgjuar shumë fjalë të tipit 'trajneri ka sjellë shqiptarët e tij'. A thua se ata po marrin miliona euro te Liria. Emrat shqiptarë të futbollistëve janë një luks për atë kampionat, pasi kanë shumë eksperiencë dhe nivel për të përfaqësuar skuadrën dhe unë dua t'i falënderoj që erdhën të më ndihmonin mua. Kohët e fundit pati edhe situata të rëndomta, pasi paguheshin vetëm një pjesë e lojtarëve dhe porositeshin që të mos tregonin se ndoshta jo të gjithë do të paguheshin". Pozicioni- "Në një klub, në qoftë se kryesia, presidenti dhe trajneri nuk shkojnë, gjithçka ka mbaruar. Unë i vura në dijeni lojtarët për situatën dhe u thashë se do të rri edhe për ndeshjen, që të mos i lë në baltë dhe do të largohem pas ndeshjes. Më e bukura dhe ajo që më bën të ndihem krenar është se të gjithë futbollistët, pa përjashtim, më dërguan mesazhe dhe më erdhën në shtëpi, duke më kërkuar që të mos largohem dhe të mos i lë në rrugë". Eksperienca- "Pavarësisht ndodhive të javëve të fundit, kjo eksperiencë më ka ndihmuar shumë dhe më ka bërë shumë mirë, pasi kuptova se dua të bëj trajnerin në të ardhmen. Pozicioni im është i qartë dhe po rri vetëm për futbollistët, pasi nuk më intereson fare nëse do paguhem apo jo. Të hënën do të jem në Prizren, për të drejtuar stërvitjen".