Sadiku, përplasje horror me Lopezin, portieri humb ndjenjat
Portieri i Espanjolit me urgjencë në spital, gjakderdhje dhe humbje kujtese për bomberin shqiptar
Ankth dhe frikë! Të tilla kanë qenë çastet pas minutës së 40-të në ndeshjen e vlefshme për javën e 27-të në La Liga mes Levante dhe Espanjol, e cila ka përfunduar 1-1. Një kros drejt zonës së miqve ka bërë që portieri i Espanjolit të dalë për të larguar rrezikun dhe, në të njëjtën kohë, Armando Sadiku ka sulmuar zonën. Në minutën e 40-të, sulmuesi dhe portieri janë përplasur kokë më kokë mes tyre. Loja është ndërprerë dhe është dashur menjëherë ndërhyrja e stafeve mjekësore.
DËMTIMI - Sulmuesi i Kombëtares ka pasur gjakderdhje në hundë dhe në momentet e para nuk ka shfaqur probleme serioze. "Panorama Sport" ka mësuar
se bomberi kuqezi ka pasur humbje të kujtesës për fare pak çaste nga goditja e fortë me kokë. Fatmirësisht, Armando Sadiku nuk ka pasur asnjë problem dhe ka vijuar takimin deri në fundin e fraksionit të parë të lojës. Për bomberin kuqezi, përplasja me kokë nuk i ka krijuar asnjë dëmtim dhe asnjë të çarë. Për të parandaluar probleme
për shqiptarin, trajneri i Levantes ka vendosur që ta lërë në dhomat e zhveshjes bomberin. Sadiku e kishtë nisur ndeshjen si titullar me Levanten, por pas saj shkoi gjithsesi në spital për kontrollet rutinë. DIEGO LOPEZ - Gardiani i Espanjolit ka shkaktuar ankth pas kësaj përplasjeje, teksa menjëherë stafi mjekësor e ka transportuar me barelë dhe autoambulancë drejt spitalit më të afërt si shenjë parandaluese. Mjekët kanë raportuar se bëhet fjalë për një humbje të kujtesës, mirëpo, siç kanë shpjeguar, gjithçka do të kalojë pa asnjë pasojë për të.
BARAZIMI - Ndeshja ka përfunduar në shifrat e barabarta, 1-1. Skuadra e Sadikut ka qenë e pafat, teksa penalltia e shënuar nga Morales në minutën e 55-të është barazuar në kohën shtesë. Baptistao ka shënuar në minutën e 91të, duke barazuar shifrat dhe duke i hequr shijen e fitores Levantes së shqiptarit. Kjo e fundit gjendet në kuotën e 21 pikëve pas 27 javëve të luajtura. Olsi Tujani