Çelsi “parkon autobusin”, por Siti e shkatërron
Kampionët e Kontes tani e shohin 5 pikë larg zonën Champions
Mançester Siti v a z h d o n marshimin. Nuk ishte shfaqja më fantastike që kemi parë nga skuadra e Pep Guardiolës, por kryesuesit u kontrolluan mirë në pjesën e parë nga Çelsi i Antonio Kontes. Siti u zhbllokua në minutën e 46-të me Bernardo Silvën dhe e menaxhoi avantazhin deri në vërshëllimën finale të Majkëll Oliverit. Ishte një stafetë ideale. Kampionët në fuqi i dorëzuan titullin skuadrës dominuese të këtij sezoni. Në pritje të Kristal Palas-Mançester Junajtid, avantazhi me vendin e dytë thellohet në +18 pikë. Dhe me 4 fitore në 9 ndeshjet që kanë mbetur deri në fund, atëherë Siti hipotekon edhe trofeun e dytë të sezonit 2017-18 pas Kupës së Ligës. Çelsi largohet nga "Etihad" me kokën lartë, por pa asnjë goditje në portën e Edersonit. Humbja e dytë radhazi i largon blutë e Londrës nga vendi i katërt: -5 nga Totenhemi. Do të nevojitet një seri fitoresh radhazi për të arritur trenin e katërshes së parë dhe rikonfirmuar Champions-in. Nëse ka një trajner që mund ta bëjë një mrekulli të tillë, ai quhet pikërisht Antonio Konte.
STATISTIKAT - Shifrat janë monstruoze: 71% zotërimi i topit dhe 902 pasime të sakta, diçka që nuk ndodhte prej sezonit 2003-2004 të Arsenalit të Pathyeshëm për ta kuptuar. Siti është një makineri lufte, e aftë për të përballuar dy ndeshje jo të lehta në planin fizik dhe psikologjik, si dopio- sfida ndaj Arsenalit. "Qytetarët" e kërkuan golin që nga sulmi i parë, por gjatë gjithë pjesës së parë, mbrojtja me 5 vetë e Kontes dhe linja me 4 mesfushorë, e bllokuan kundërshtarin. Bernardo Silva emocionoi "Etihad"-in me një goditje fluturimthi në 18'. Uillian mbylli mirë një kundërsulm të komanduar nga Pedro, por braziliani gaboi shënjestër. I shkëlqyer një kontroll topi i Sanesë, që u finalizua me të djathtën e menjëhershme, por Azpilikueta shpëtoi mbi vijë fatale. Në minutën e 33-të, një tjetër goditje e Bernardos, i çmarkuar nga një harkim i David Silvës.
GOLI - Kur këta të fundit dialogojnë në minutën e parë të pjesës së dytë, Siti zhbllokohet: krosim i David Silvës, prekje jo shumë elegante e portugezit, por Kurtua nuk mbërrin dot dhe vendësit festojë. Çelsi ndërton rastin për të barazuar në 54', por Moses godet
shumë keq. Ja tek shfaqet sërish David Silva në 56': por Kurtua i përgjigjet me një pritje shpëtimtare. Siti nis të kontrollojë topin dhe Çelsi, pavarësisht aktivizimit të Zhirusë dhe në minutat e fundit të Moratës, nuk e shikon kurrë portën. Në përfundim të
ndeshjes, buzëqeshja vesh më vesh e Guardiolës tregon shumë gjëra, edhe pse katalanasi nuk humbet kurrë në eufori: "Nuk ka mbaruar dhe nuk mendojmë për rekordin. Për mua, nga nesër nis të mendoj për Bazelin në Champions dhe më pas Stokun".