“Zjarr” për Europën, klubet tregojnë muskujt
Nga Partizani-Luftëtari te Kamza-Vllaznia, ja për çfarë luhet
Nga Europa te mbi jetesa, në fushë çdo katër ditë dhe një sforcim i jashtëzakonshëm që do të zgjasë deri të mërkurën. Sot të gjitha skuadrat e Superiores zbresin në fushë, ndërsa nga pesë çifte vetëm SkënderbeuLushnja është e destinuar të luhet për... qejf. Me korçarët e distancuar dhe thuajse kampionë, por edhe lushnjarët që vetëm matematika i mban në lojë, në Korçë duket si një ndeshje pa histori. Mirëpo, gjithçka ndryshon nëse sheh çiftet e tjera, duke filluar nga Partizani- Luftëtari për të vazhduar te Laçi-Flamurtari, Kamza- Vllaznia dhe Kukësi-Teuta. Një javë "zjarri" për Europën, me klubet që duhet të tregojnë muskujt para një ndeshjeje të paprecedentë të kalendarit. Vetë pranuan të nisnin Superioren në mes të shtatorit ( përveç Skënderbeut) dhe tashmë do të vuajnë pasojat, një kampionat që për nga ngjeshja e kalendarit me "krenari" i afrohet Premier Ligës. Por, për çfarë luhet në javën e 24-t? "Lufta" për një vend në Ligën e Europës ka përfshirë gjashtë skuadra që kanë një diferencë të vogël pikësh nga njëra- tjetra. Nga Kukësi i vendit të dytë (39 pikë) deri te Kamza që pozicionohet e shtata (32 pikë), janë vetëm 7 pikë diferencë. PARTIZANI-LUFTËTARI Një ndeshje ku duket se barazimi është rezultati i vetëm që nuk u bën punë skuadrave. Luftëtari vjen në kryeqytet me dy pikë më shumë se Partizani dhe me ambicie për të hedhur një hap të madh drejt konfirmimit të pozitave për vendin e tretë. Për të kuqtë, ky është takimi debutues i Kle-
vis Dalipit, por përballë ka skuadrën që turpëroi të kuqtë në fazën e dytë me shifrat 5- 0. Një fitore e "demave" i mban këta të fundit në lojë për Europën. Nga ana tjetër, në rast se gjirokastritët ia dalin të marrin tri pikë, atëherë konfirmohen skuadra për t'u mundur, si dhe zhysin Partizanin në luftë për mbijetesë. Po, po mbijetesë, sepse llogaria është e hapur, me Vllazninë dhe Teutën që kanë shanset e tyre në ndeshjet e sotme. LAÇI-FLAMURTARI Flamurtari ka që prej 18
shkurtit që nuk fiton në kampionat ( me një barazim dhe dy humbje radhazi). Nëse nuk ia del edhe sot në Laç, atëherë pozitat i lëkunden ndjeshëm për të mbajtur minimalisht vendin e tretë. Kjo është ndeshja ku diferencat me pikë është vetëm +3 e vlonjatëve. Laçi do Europën dhe nëse ia del të thyejë Flamurtarin, atëherë katapultohet në vendin e duhur, duke përfituar pse jo nga rezultatet e rivalëve direkte. Një provë force për të dyja skuadrat, me kurbinasit që kanë treguar se vuajnë jo pak në shtëpi. Ekipi i Duros ka shansin të tregojë se dy humbjet e fundit janë rastësi. KUKËSI-TEUTA
Takim delikat në "Zeqir Ymeri", me kampionët në fuqi që fusha e tyre u është kthyer në makth këtë sezon. Më e vështirë bëhet edhe për faktin se Teuta vjen të luajë gjithçka për gjithçka. Është nga ato sfida ku Kukësi nëse fiton mund të përfitojë dyfish ( distancohet nga vendi i tretë), duke pasur parasysh edhe përballjen në një shkallë të lartë vështirësie të Flamurtarit ndjekës. Ndërsa durrsakët, duke mos pasur çfarë të humbin dhe për më tepër që janë në një zonë ku humbja nuk lejohet, do të provojnë të bëjnë hapin e madh. Një fitore në Kukës e Teutës mund të cilësohet si hap gjigant, teksa mban nën presion Vllazninë, duke shpresuar në të njëjtën kohë edhe te humbja e kësaj të fundit, që luan një transfertë delikate kundër Kamzës. KAMZA-VLLAZNIA Dy humbje radhazi dhe një presion gjithnjë e në rritje, pavarësisht se është në një pozicion komod. Kamza ka shansin të tregojë se gjithë ajo pjesë e parë e sezonit e shkëlqyer nuk është rastësi, por një vazhdimësi. Fati i keq i skuadrës së Ndreut është se pret një Vllazni në formë dhe me një anë psikologjike të lartë. Fitorja e mundshme e shkodranëve fut vetvetiu në vallen e mbijetesës edhe Kamzën, ndërsa tri pikët e vendësve, do të konfirmonin jo vetëm pretendimet për zonën europiane, por edhe faktin se Vllaznia është e destinuar të vuajë sërish. Makthet e sezonit të kaluar janë si një kujtim i afërt, por në Shkodër nuk besojnë se do t'i bëjnë tifozët me zemër deri në fund.