Lushnja pa frikë, me tre sulmues ndaj Skënderbeut
Trajneri Çuko kërkon një skuadër të ekuilibruar, Canka i kënaqur me vendosjen pas dy sulmuesve
Skuadra e drejtuar nga Dritan Çuko, pa mbyllur dje përgatitjet për Skënderbeun dhe pas përfundimit të saj, ekipi lushnjar niset në drejtim të Korçës. Mikel Canka ndihet komod me pozicionin e ri dhe në një prononcim për "Panorama Sport", u shpreh: "Jam ambientuar shumë mirë me pozicionin e ri, që nuk e kam bërë ndonjëherë. Po përshtatem në pozicionin pas dy sulmuesve dhe shpresoj të jap më të mirën në ndeshjet në vazhdim, sidomos në këtë përballje me Skënderbeun. Me Kukësin luajtëm me dy sulmues, unë isha më prapa. Kur ke përpara një sulmues si Sefa pret gjithmonë ndihmë, sepse 80% të topave i ke të ulura dhe një lojtar si unë aty mund të përfitojë". Ndërsa trajneri Dritan Çuko, në intervistën e tij për "Panorama Sport", deklaroi se Lushnja do të tregohet dinjitoze në Korçë në ndeshjen midis ekstremeve të kampionatit. Çuko, si e shikoni përballjen e radhës me Skënderbeun? Patjetër, që është një ndeshje shumë e vlerësuar nga ana jonë. Luajmë në transfertë ndaj skuadrës më të mirë të kampionatit. Çunat janë të motivuar për të dhënë vlerat e tyre më të mira në këtë ndeshje. Përveç Xhafës, Markut dhe Korreshit, që kanë dëmtime të gjata, kemi edhe dy futbollistë të skualifikuar, Maganin dhe Çelën. Rikthehet Branica që është gati, ndërsa për Monen do të vendosim në çastet e fundit. Ndaj Kukësit luajtët me skemën 4-3-1-2. Po ndaj Skënderbeut? Po, kështu do të jetë. Në këtë modul, skuadra më duket më në ekuilibër. Pres një ndeshje të mirë në nivel individual dhe në nivel reparti. Të jemi të saktë në koordinimin e veprimeve. Pra, nuk do të jetë një Lushnjë që vetëm do të mbrohet? Jemi me shtatë lojtarë në fazën mbrojtëse, por, që mund të përpunohet në varësi të ecurisë së ndeshjes. Do të jemi me Pepën dhe Sefën në sulm dhe pas tyre do të jetë Canka. Kam besim se ekipi do të luajë mirë edhe në pjesën e dytë të fushës. Unë dua që skuadra të ketë raporte me portën kundërshtare dhe të shënojë në çdo ndeshje. Alban Alushi