Kamza e karikuar, Frashëri merr “krahun”: I thyejmë shkodranët
Njeriu asist i ekipit të Ndreut beson se ekipi do rikthehet te fitorja
Kamza vjen pas dy humbjeve radhazi në kampionat dhe nëse nuk do që të komprometojë pozitat në klasifikim, atëherë duhet të fitojë sot kundër Vllaznisë. Të ndërgjegjshëm se i pret një takim shumë delikat, të besuarit e Ramadan Ndreut kanë besim absolut se do ta kalojnë pengesën shkodrane. Njeriu asist i Kamzës, Erlis Frashëri, një nga më të mirët e ekipit këtë sezon, në një bisedë për "Panorama Sport" analizon situatën në skuadër, si dhe flet për ndeshjen e sotme. Sipas tij, Kamza i ka të gjitha mundësitë për të arritur një fitore, e cila do ta qetësonte në vazhdimësinë e kampionatit që po bëhet shumë i fortë. SITUATA - "Vijmë pas dy ndeshjesh jo të mira. Fillimisht u mposhtëm në shtëpi nga Teuta ku mendoj se bëmë një paraqitje të dobët, edhe pse arbitri ndikoi jo pak në rezultat me vendimet e tij. Ndërsa humbjen në Gjirokastër dua ta cilësoj më
shumë si një aksident. Deri në momentin e pësimit të golit, mendoj se ishim të vendosur shumë mirë në fushë dhe meritonim një pikë me lojën që bëmë. Luftëtari ka lojtarë cilësorë, por e pësuam golin në një mënyrë që askujt nuk ia priste mendja. Në futboll ndodh gjithçka, pasi
portieri ynë, Gjonikaj, ishte më i mirë në fushë deri pa pësuar golin", deklaroi fillimisht Frashëri, i cili luan si mbrojtës i krahut të djathtë te Kamza. NDESHJA - "Ndaj Vllaznisë është mundësia më e mirë për të treguar se ndodhemi në këto pozita me plot meritë. Sigurisht, çdo skuadër ka momentet e mira dhe negative gjatë një sezoni, por unë mendoj jemi shfaqur kompaktë në shumicën e ndeshjeve. Vllaznia ka një ekip të mirë, por nuk na tremb aspak. Edhe ne kemi shumë lojtarë që bëjnë diferencën, kështu që thjesht këtë herë duhet të jemi më të përqendruar në fushë dhe të mos u lëmë asnjë shans shkodranëve. Presioni? Jo, nuk bëhet fjalë të ndihemi nën presion. Drejtuesit na kanë mbështetur fuqimisht dhe do të mundohemi t'ua shpërblejmë deri në fund. Kampionati po bëhet shumë i vështirë", përfundoi korçari. A. Dushku