Llogaritë e Besëlidhjes, sot luan shansin e fundit
Trajneri Lani: Na favorizon kalendari, s'jemi nën presion
ë premten pasdite, Besëlidhja u dha fund përgatitjeve për sfidën ndaj Kastriotit që do të luhet sot në orën 14:00 në stadiumin e Lezhës. Java e 19-të shënon edhe startin e fazës së tretë të kampionatit. Si zakonisht, në ditën e fundit stërvitore Besëlidhja iu nënshtrua një stërvitjeje të lehtë, ku u përqendrua kryesisht në përgatitje teknikotaktike dhe gjuajtje në portë. Sfida ndaj Kastriotit është një ndeshje deçizive për të dyja skuadrat, pasi një fitore e Besëlidhjes rihap kampionatin duke e ngushtuar diferencën në 7 pikë. Kjo mund të jetë ndoshta edhe mundësia e fundit e lezhjanëve për të shpresuar sadopak se mund të kapin vendin e parë.
TRAJNERI - Tekniku Gledis Lani është i qartë në pretendime, ndaj do të luftojë fort për të marrë një fitore ndaj krutanëve, pasi ende nuk ka hequr dorë nga ëndrra e Superiores. Këtë e shprehu gjatë një prononcimi për "Panorama Sport". "Besëlidhja është një skuadër, që ndonëse ka një dekadë që luan në Kategorinë e Parë, pjesën dërrmuese të kohës ka qenë kërcënimi kryesor për skuadrat pretendente. Mbyllja e fazës së dytë në 5shen e parë dhe trendi pozitiv i skuadrës në ndeshjet e fundit, tregon qartë se ne do të mbetemi përsëri kërcënimi kryesor për kreun, ndaj lufta jonë gjatë kësaj faze do të jetë edhe më e fortë, pasi nuk do të heqim dorë nga pretendimi për ngjitje. Pozitive për ne është fakti se kalendari na favorizoi që ta nisim fazën, duke u ndeshur me skuadrën e kreut, ku në fund të takimit do të përcaktohen qartë objektivat
tona. Tjetër armë favorizuese për ne është se ekipi tashmë është çliruar nga presioni i rënies, çka e bën edhe më të qartë në veprimet e saja në fushën e lojës. Duke ditur se Kastrioti deri këtu ka ardhur me këmbët e veta dhe me një bilanc tepër pozitiv, ne
e kemi vlerësuar maksimalisht, ndaj kam kërkuar dhe do të kërkoj nga futbollistët që të minimizojnë sa më shumë gabimet, pasi në sfida të tilla ato ndikojnë mjaftueshëm në rezultat", përfundoi prononcimin e tij, trajneri i Besëlidhjes, Gledis Lani.