Kupa, Vllaznia me 5 “yje”
Për kryeqytetaset është një sukses arritja në këtë finale, pas shumë vitesh
llaznia është fituese e Kupës së Shqipërisë për femra, teksa ka likuiduar 6 me 1 Tiranën në "Elbasan Arena". Në një ndeshje të dominuar tërësisht nga shkodranet, serinë e golave e hapi Gjegji. Në pjesën e parë shënuan edhe Gjini dhe Djegsina një dopietë, ndërsa golin e nderit për Tiranën e shënoi Atlok. Në fraksionin e dytë realizoi edhe Gruda me Doçin për Vllazninë, duke hipotekuar fitoren e thellë tenistike në këtë finale dhe rikonfirmuar shkodranet si skuadrën më të mirë shqiptare të futbollit të femrave.
PJESA E PARË - Janë shkodranet ato që e nisin më vrullshëm ndeshjen dhe e shtyjnë që në fillim përpara. Ia dalin që të kalojnë shumë shpejt në avantazh që në minutën e 8-të me anë të Gjegjit. Pas një shpërthimi nga mesi i fushës, del e vetme me portieren Popa dhe nuk gabon. 0 me 1 për Vllazninë. Nuk kalojnë as katër minuta lojë dhe është Gjini që dyfishon shifrat, pas një inkursioni nga krahu i majtë. Tirana nuk duket gjëkundi dhe në disavantazh të dy golave has vështirësi për të dalë përpara. Shkodranet dominojnë dhe në të 29-ën është radha e Djegsinës për të trefishuar shifrat pas një gabimi të portieres Popa. Praktikisht duket gjithçka e mbyllur, por shkodranet nuk "ngopen" dhe është sërish Djegsina që shënon në minutën e 39-të, duke i dërguar shifrat në 0 me 4. Gjithsesi, para vërshëllimës për përfundimin e pjesës së parë, Tirana ngushton shifrat me anë të Atlok, teksa i mjaftoi një devijim i vogël për ta dërguar sferën në rrjetë.
PJESA E DYTË - Fraksioni i dytë i lojës nis i qetë, me një Vllazni
që ka siguruar fitoren dhe Tiranën, që nuk ka fuqi të bëjë përmbysjen. Teknikët mundohen të bëjnë ndryshime, me Lekën që freskon ekipin me tri zëvendësime dhe Dangjian që hedh në sulm Valbona Popën. Megjithatë, për t'ua bërë më të lehtë golin e pestë shkodraneve
mendon portierja Anjeza Popa që gabon në pasim dhe Gruda përfiton, duke shënuar golin e pestë. Pak minuta më pas, Doçi godet shtyllën pas një goditjeje dënimi. Kjo ishte e dyta herë, gjatë kësaj ndeshje, duke e bërë të pafat këtë "bombere" të skuadrës shkodrane, e cila nuk
po dilte te goli. Në fund ka menduar kryesorja, Esmeralda Rusto, duke akorduar një 11-metërsh në fundin e takimit dhe Doçi u lumturua, duke shënuar golin e shumëpritur, duke vulosur fitoren 6-1. Kështu, Vllaznia e bën pronë Kupën e Shqipërisë për të 5-n herë.