Venger rigjen fitoren, por jo gjumin: Ferguson më përkrah

Arsenali është rikthyer te fitorja, por rezultati pozitiv i arritur ndaj Milanit duket se nuk e ka ndihmuar trajnerin e "Topçinjve" të rigjejë gjumin. Në konferencë për shtyp, në prag të sfidës së nesërme me Uotfordin, tekniku francez deklaroi: "Çdo trajner mund t'ju konfirmojë se kur nuk arrin rezultate, gjëja e parë që preket është humori, mungesa e gjumit dhe dëshira për të gjetur zgjidhje. Kjo është pjesë e punës sonë, pavarësisht se kur jemi të rinj ëndërrojmë të korrim fitore në krye të skuadrës". Klubi i Londrës veriore u mund dy herë brenda një jave nga Mançester Siti dhe aktualisht ndodhet në vendin e gjashtë në tabelën e Premier Ligës, 33 pikë larg nga kryesuesit. Fitorja e së enjtes 2-0 ndaj Milanit i ka dhënë frymëmarrje francezit, i cili ndodhet nën një presion në rritje për t'u larguar nga stoli, me kërkesë të një pjese jo të vogël të tifozëve të klubit. "Ata nuk më urrejnë mua personalisht, por faktin që ndoshta nuk po e bëj punën ashtu si ata do të donin. Unë jam i pari që mërzitet kur nuk fitojmë. Arsenali ka 30 milionë tifozë dhe ju siguroj se nuk është diçka e bukur të trishtosh miliona njerëz". Pavarësisht nga nënshkrimi i një kontrate të re në verën e kaluar, 68-vjeçarin nuk e shqetësojnë shumë zërat e një divorci

në verë: "Kam pasur shumë mesazhe nga (menaxherët e kaluar dhe aktualë) të cilët janë përkrahës ndaj më duhet të shpreh publikisht mirënjohjen pasi të gjithë kalojmë momente të vështira. Një prej atyre që më shkruajnë është Aleks Ferguson, i cili më ngushëllon kur gjërat nuk shkojnë mirë".