Shkëlqen Bajerni, leksion turqve edhe në shtëpi
Gjermanët kualifikohen në çerekfinale me një 8-1 ndaj Beshiktashit, Hejnkes vendos rekord
Duhej të ishte një shëtitje, ose pothuajse! Dhe kështu rezultoi. Bajerni i Mynihut, pas uraganit 5- 0 në ndeshjen e vajtjes, fundos Beshiktashin edhe në "Vodafone Arena": 3-1 rezultati final. Dhe ndeshjen e vendosën një gol i Tiago Alkantarës në minutën e 18-të (i cili 17 minuta më vonë tremb Hejnkesin, duke lënë fushën i dëmtuar). Një autogol i Gënyl në minutën e parë të pjesës së dytë dhe një gol me kraharor i sulmuesit Sandro Vagner në fundin e ndeshjes (goli i tij i parë në Champions), shuajnë flakët e "ferrit të Bosforit" dhe zhurmën e stadiumit më të frikshëm të Europës (zhurma arrin deri në 140 decibel). Për ta zbutur humbjen në shtëpi të turqve, mendon Vagner Lov. Në minutën e 59- të, braziliani shfrytëzon një gabim të David Alabës dhe në rënie e sipër mposht Ulraishin me të majtën. Bajerni fluturon në çerekfinale pa asnjë dyshim, duke e mposhtur kundërshtarin me rezultatin e përgjithshëm 8-1.
PROTAGONISTËT - Trajneri i bavarezëve, Jup Hejnkes e merr seriozisht edhe ndeshjen e kthimit, duke u prezantuar në fushë me një rrotacion të lehtë: kursen Kimish (në vend të talentit gjerman luan veterani Rafinja) ndërsa Riberi përbën tridhëmbëshin e sulmit me Levandovskin dhe Mylerin. Gynesh, i pamposhtur në shtëpi prej 6 ndeshjesh në Ligën e Kampioneve, 39 nëse do të konsideronim edhe ato në kampionat, duhet t'i bëjë llogaritë pa Vida, Pepen dhe Tosiç në mbrojtje dhe i lind detyra për ta riorganizuar edhe njëherë repartin e prapavijës. Në qendër të mbrojtjes thërret Geri Medelin (ish-interisti bën një ndeshje të mirë) së bashku me Ujsal. Braziliani Vagner Lov kërkon të çajë mbrojtjen gjermane, duke detyruar Humelsin dhe Boatengun të luajnë ashpër (ndëshkohen që të dy me karton). Bajerni që nuk e mban as topin (49%), e mbështet lojën e tij kryesisht nga krahët: Rafinja dhe Alaba janë lokomotivat dhe Myler dhe Riberi gjithnjë të hidhur përpara porte. Pak jashtë ritmit duket Levandovski. Sulmuesi polak, autor i 14 golave në 16 ndeshjet e fundit në Ligën e Kampioneve, neutralizohet nga Medel dhe zëvendësohet nga Sandro Vagner. Me këtë sukses, Jup Hejnkes arrin fitoren e 11-të radhazi në Champions (mes sezonit të tripletës 2012-13 dhe këtij) dhe vendos rekord, duke kaluar Karlo Ançelotin dhe Luis Van Galin.