Moviola, mungon një penallti për vlonjatët
FSHF kishte dërguar në Vlorë ndërkombëtarin Enea Jorgji, ndërsa asistentë të tij ishin Emigres Ganxhi dhe Astrit Mahmuti. Asistenti i parë, Ganxhi, u bë protagonist në dy penallti, por me njërën që nuk ishte, teksa futi në lojë edhe Jorgjin, që gaboi më pas, duke mos ndëshkuar me të verdhë Zguron e Kamzës. Ja rastet për moviolë: 27' Pas një krosimi nga e majta në zonë, Musta në duel me Raçiç, e prek topin me dorë. Anësori Ganxhi sinjalizon kryesorin Jorgji dhe ky i fundit jep 11-metërsh. Vërtet kemi të bëjmë me një prekje të pavullnetshme, pasi dora është në pozicion natyral dhe Musta është me shpinë dhe nuk e prek topin me qëllim, por arbitri ka vepruar drejt. 28' Ndërhyrje horror me të dyja këmbët e Xhufos në mesfushë kundër Ymerajt. Jorgji e fal, duke i dhënë vetëm të verdhë.
74' Raçiç tenton të driblojë Bicajn dhe ky i fundit e pengon në afërsi të zonës. Jorgji e ndëshkon me të verdhë, ndërsa më parë kishte marrë një të tillë pas zënkës me Zguron. Vendim i drejtë i kryesorit. 81' Musta kroson në zonë, Zguro tërheq nga bluza Kamara, ndërsa Jorgji akordon penallti pas sinjalizimit të anësorit Ganxhi. Por, kemi të bëjmë me pozicion jashtë loje të Kamara dhe anësori nuk e sheh. Këtu gabon edhe Jorgji, pasi nuk ndëshkon me të verdhë Zguron. Nëse e ndëshkonte, lojtari i Kamzës do dilte me të kuq pas dy të verdhave. 88' Alvesh driblon Çukoviç në fundore dhe ky i fundit e prek topin me dorë. Gjyqtari vijon lojën, por gabon, pasi kemi të bëjmë me penallti. 90' Siljanovski godet me takë në anësore Fukuin, në një ndërhyrje horror, që është në limitet e të kuqit. Jorgji i jep vetëm të verdhë.