Besëlidhja, tani shpreson te... matematika
Lezhjanët kthejnë sytë nga të rinjtë, Berisha: Do tentojmë gjithçka deri në fund
Besëlidhja vijon stërvitjen intensive në kuadër të javës së 20-të të kampionatit të Kategorisë së Parë, nën drejtimin e lezhjanit Gledis Lani. Të shtunën, lezhjanët e Besëlidhjes do të udhëtojnë drejt Rrogozhinës për t'u ndeshur me Egnatian për llogari të javës së 2të të fazës së tretë. Fundjavën e kaluar, Besëlidhja u ndesh në shtëpi me Kastriotin kryesues, por takimi u mbyll pa gola, duke i frenuar krutanët në arratinë e tyre, por për vete nuk ndryshuan gjë pasi diferenca mes tyre mbeti po ajo e 10 pikëve. Tashmë e gjithë vëmendja e lezhjanëve të Besëlidhjes është e përqendruar te sfida e radhës ndaj Egnatias pasi ende shpresojnë, duke pasur parasysh matematikën. Gjatë gjysmës së dytë të sezonit, në radhët e Besëlidhjes janë aktivizuar edhe disa futbollistë të rinj të ardhur nga moshat lezhjane. Një ndër ta është edhe i riu Xhulio Berisha që në tri ndeshjet e fundit ka qenë titullar. Në një prononcim për "Panorama Sport", ai shprehet: "Ëndrra ime për fanellën e Besëlidhjes shpresoj se po bëhet realitet, ndonëse sapo e kam veshur në gjysmën e dytë të sezonit, kjo për mua është një kënaqësi. Fitorja jonë ndaj Dinamos na e dha mundësinë që të mbetemi në vallen e pretendentëve për një vend në Superiore, por barazimi një javë më pas ndaj Kastriotit na e zbehu entuziazmin. Gjithsesi, matematika na lejon që të shpresojmë, ndaj po punojmë intensivisht që pjesa e mbetur e kampionatit të jetë nën kontrollin tonë, pasi Besëlidhja gjithmonë ka qenë kërcënim real për skuadrat e kreut dhe shpresojmë se të tillë do të mbetemi deri në fund", përfundoi Berisha. Preng Gjikola