Laçi fiton mes tensionit, disfatë e protesta për Kamzën
I gjendur në habitatin e tij, Laçi ia del që të sillet si duhet për të marrë tri pikë. Në një përballje mes tensionit dhe lojës së ashpër, kurbinasit marrin maksimumin, duke shfrytëzuar inferioritetin numerik të Kamzës që nga minuta e 18-të. Një faull inekzistent bën Frashërin që të debatojë dhe protestojë ashpër, por Beqiri nuk e kursen dhe e ndëshkon me dy kartonë: një të verdhë dhe një të kuq. Kamza kishte qartësinë dhe mënyrën e duhur të të sjellurit në fushë edhe pse me dhjetë vetë, por në fund nuk arrin që të marrë të paktën edhe një pikë.
TENSIONI - Stadiumi ishte i mbushur dhe vendësit kërkonin me çdo kusht fitoren. Me kalimin e minutave, Laçi shton presionin dhe është kryesori Beqiri që i heq "valvulin", tensionit në këtë takim. Një faull inekzistent në favor të Laçit në hyrje të zonës, bën që miqtë të kundërshtojnë dhe protestojnë. Në fillim ka një të verdhë për Çukoviç dhe Frashërin, por ky i fundit nuk mjaftohet me kaq dhe vijon debatin. Kryesori nuk fal dhe i tregon në fytyrë kartonin e kuq. EKUILIBRI - Pritej që Laçi të diktonte, por ka numra të shumtë në fushë pa saktësi, qartësi dhe kthjelltësi. Superioriteti numerik nuk shfrytëzohet dhe Kamza mbron mjaft mirë. Rexhinaldo me një kthesë pa forcë në zonë dhe më pas Ymeraj me tentativën nga distanca, janë shumë pak për pjesën e parë. Ky fraksion do të mbyllet pa gola. PRETENDIMET - Në fraksionin e dytë, Kamza nis me ritëm konstant, ndërkohë që Laçi ka vrull për të kërkuar golin e avantazhit. Mirëpo, tensioni shoqëron edhe këtë fraksion. Në të 52-tën, Shtubina futet në zonën e Kamzës nga e djathta dhe tenton kalimin mes dyshes Plaku-Fukui dhe rrëzohet, por për kryesorin Beqiri nuk ka penallti. Më tej, në të 67-ën, një asist i Malajt për Plakun bën që ky i fundit të jetë në zonë, por ndërhyrja nga pas e Lulajt, nuk mjafton për kryesorin e ndeshjes që të akordojë 11-metërsh. Beqiri balancon… gabimet.
FITORJA - Kamza ka sigurinë në mbrojtje, por nuk shfrytëzon kundërsulmet, ndërsa vendësit nuk rreshtin së tentuari. Në minutën e 70-të, krosimi i Shtubinës gjen Uzunin në kërcimin e duhur, duke fituar duelin ajror me shtatlartin Çukoviç, i ndihmuar edhe nga dalja e gabuar e Avdylit, bën që goditja e tij me kokë të pushojë në rrjetë. Laçi feston dhe për Kamzën, "malorja" bëhet thuajse e pamundur për t'u ngjitur. Megjithatë, të besuarit e Ndreut nuk dorëzohen. Një krosim i Fukuit gjen Raçiç që gjuan me kokë, por sfera tradhton pasi përfundon jashtë, ngjitur me shtyllën. Mundësi e artë, e cila do të pasohet nga një kundërsulm i Laçit dhe goditje e Kallakut, por Avdyli bën mrekullinë dhe shmang një gol të sigurt. Kjo tentativë e minutës së 90-të do të pasohet nga një kundërsulm i vendësve me Rexhinaldon dy minuta më vonë, i cili futet në driblim në hyrje të zonës dhe gjuan saktë në cepin e majtë të portës së Avdylit. Laçi vulos fitoren 2-0 dhe kap Kukësin në vend të dytë, ndërkohë që Kamza qëndron e shtata në kuotën e 34 pikëve, vetëm 7 më shumë sesa Vllaznia…