Mezani: Nuk e imagjinonim vendin e dytë

Trajneri i Laçit ka deklaruar se për të dhe gjithkënd në kampin e kurbinasve ka qenë i pamenduar një pozicionim i tillë në tabelë. Gentjan Mezani, në deklaratën e dhënë për "Super Sport", është shprehur i kënaqur me reagimin e ekipit në fraksionin e dytë. FITORJA - "Ishte një ndeshje jashtëzakonisht e vështirë dhe e dinim këtë, pasi Kamza është skuadër e mirë dhe mbrohet me shumë forca. Kjo bëri që ta kishim më të vështirë për të dalë në lojën tonë. Në të dytën u futëm më të bindur dhe bëmë atë që duhet", u shpreh fillimisht Mezani. TIFO PËR VLLAZNINË - "Ne duhet të shikojmë edhe nesër (sot) një rezultat. Megjithatë, në fillim duhet që të shohim ndeshjet tona sepse çdo gjë do të bëhet më e lehtë për objektivin. Të mundohemi të marrim pikët maksimale për çdo ndeshje, por edhe të luajmë futboll sepse jemi akoma larg nga loja dhe forma e fazës së dytë". SUPERIORITETI NUMERIK - "Ishte mënyra e gabuar e kërkimit të golit në pjesën e parë. Në pushim fola me ekipin sepse ishte e vështirë që Kamza të çahej në prapavijë. Iu kërkova që të godisnin nga anësorja dhe rezultoi pozitive". TRYSNIA - "Absolutisht që nuk e kemi menduar këtë pozicion. Ne po mundohemi që skuadrën ta mbajmë me këmbë në tokë dhe po flasim përditë, pasi janë djem të rinj. Edhe lojtarët me eksperiencë po na ndihmojnë. Ne nuk shohim as kupat e kampionëve, as vendin e dytë apo të tretë. Ne duam vetëm të luajmë. Nëse do të luajmë si në fazën e dytë do të jemi të vështirë për t'u mundur", ka përfunduar Mezani.