Skënderbeu “revolton” Luftëtarin
Dy penallti, një e paqenë dhe një e mohuar, kanë prishur ndeshjen e djeshme në Korçë
Skënderbeu fiton edhe kur luan me 40 për qind të kapacitetit të tij. Kjo nuk është më një gjë e re dhe korçarët e konfirmuan edhe në ndeshjen e djeshme ndaj Luftëtarit, ku më së shumti synuan të qarkullonin topin dhe të ulnin ritmin e lojës përballë një skuadre që, me mungesa të shumta, nuk arriti të shfrytëzonte këtë "mangësi" të kryesuesve. Bluzinjtë luftuan shumë, por e kishin të vështirë përballë eksperiencës së vendësve që të bënin diçka më shumë për të dalë me pikë nga kjo transfertë, ndërkohë që duhet përmendur fakti se gjykimi i penalizoi në të paktën dy raste, që mund të konsiderohen vendimtare për rezultatin. Me këtë fitore, Skënderbeu shkëputet momentalisht 18+ pikë nga vendi i dytë, ndërsa Luftëtari vazhdon të jetë mes ekipeve që shpresojnë për një vend në Europë.
PJESA E PARË
Korçarët luajnë në shtëpi, janë të qetë dhe nuk mendojnë shumë për fazën sulmuese, edhe pse trajneri Daja ka hedhur në fushë nga minuta e parë Souenë dhe Xhejmsin. Nga ana tjetër, Luftëtari e ka të vështirë që të gjejë hapësira në mbrojtjen kundërshtare, pasi Radas dhe Vangjeli, me eksperiencën e tyre, arrijnë të mbyllin mirë hapësirat. Dhe në një situatë të tillë, gjuajtjet nga jashtë zone janë zgjidhja e vetme, por nuk rezultojnë efikase. Në këtë situatë, diferencën e bën cilësia. Minuta e 32-të dhe Lilaj jep një pasim të saktë për Xhejmsin, i cili mes dy mbrojtësve arrin të rrotullohet dhe të gjuajë lehtë, por kaq mjafton që topi të shkojë në rrjetë. Avantazhi qetëson korçarët dhe fut më shumë në presion Luftëtarin. Abazaj i vetëm e ka të vështirë që të bëjë diçka. Dhe si për t'i për të hipotekuar fitoren mendon edhe gjyqtari. Një top i gjatë për Souenë arrin të kontrollohet nga ky i fundit që, pasi tenton të shmangë edhe portierin, rrëzohet. Kryesori Sino nuk mendohet dy herë dhe akordon 11-metërsh të paqenë. Lilaj në minutën e fundit të kësaj pjesë nuk gabon dhe dyfishon shifrat. PJESA E DYTË Bluzinjtë nuk kanë gjë për të humbur dhe Rrapo i lë vendin Mingës. Shehi për korçarët lë fushën i dëmtuar dhe Teqja zë vendin e tij. Në këtë fraksion
të takimit, bluzinjtë janë disi më aktivë dhe vënë në vështirësi Skënderbeun që duket i lodhur në fushë. Duhet të kalojnë 25 minuta që gjirokastritët të realizojnë golin e parë, ku Liçaj me kokë përfiton nga një gabim në dalje i Teqjes dhe
realizon. Të besuarit e Likës rrisin presionin në portën kundërshtare, por këtë herë fati nuk është në anën e tyre, pasi topat e gjuajtur në drejtim të kuadratit herë gjejnë këmbët e mbrojtësve dhe herë trupin e portierit.