Duda: Presioni mbi kryesuesit, ne nuk kemi çfarë humbasim

Apolonia zhvendos vëmendjen te Tirana, që është edhe kundërshtari i radhës. Nëse në fazën e dytë, fierakët ndalën në shtëpi kryesuesit e grupit B, tashmë që gara për kreun është ndezur, kryeqytetasit nuk do t'ia falnin vetes të gabonin sërish. Aq më tepër do të kërkojnë t'i dëshmojnë Apolonisë forcën e tyre dhe se barazimi në Fier ka qenë një rastësi. Por bardhejeshilët nuk kanë komplekse nga emri i madh i Tiranës dhe luajnë të qetë, pasi nuk rrezikojnë në objektiva. Nuk do të shkojnë për shëtitje në kryeqytet, por kanë ambicien e tyre pozitive për t'i dëshmuar opinionit sportiv dhe

Tiranës se ndeshja e fazës së dytë nuk ka qenë rastësi. Këtë e deklaron qendërmbrojtësi Denis

Duda, një nga më të mirët në ndeshjen e kaluar ndaj bardhebluve, duke e nxjerrë "jashtë loje" anglezin Ngoo të Tiranës.

"Fillojmë javën e përgatitjes për ndeshjen kundër Tiranës. Kemi pasur dhe një javë tjetër në dispozicion dhe kjo ka qenë pozitive për ne. Nuk do të jetë e lehtë dhe nuk nisemi nga barazimi që morëm me ta. Një ndeshje nuk i ngjan një tjetre, për më tepër që nuk luajmë në fushën tonë. Megjithatë, ne nuk kemi se çfarë të humbasim. Edhe në këtë takim presioni është te Tirana, e cila do të kërkojë fitoren me patjetër. Ne do ta shfrytëzojmë këtë gjë për të ndërtuar lojën tonë dhe për të synuar që minimalisht të mos dalim pa pikë", thotë qendërmbrojtësi i Apolonisë, Denis Duda. Në fazën e parë në Tiranë, bardheblutë kanë fituar 2-0, por Apolonia ka zhvilluar një lojë të mirë, çka pretendon ta bëjë edhe në këtë takim të radhës. Bujar Rama