Dëmtohet Grezda, Mavraj: Panuçi më energjik se De Biazi
Pritet të mungojë të hënën, Panuçi do t’i japë shansin talentit të Luftëtarit
Eros Grezda dëmtohet dhe rrezikon të mungojë ndaj Norvegjisë të hënën. Mesfushori i krahut braktisi seancën e djeshme, teksa pësoi një goditje në kavilje. Ai ndjeu dhimbje dhe u largua drejt rezidencës nën shoqërimin e një prej fizioterapistëve të Kombëtares. Burime të "Panorama Sport" pranë stafit kuqezi, bëjnë të ditur se shkalla e lëndimit nuk është serioze, por gjithsesi duke parë situatën, u preferua që Grezda të mos vijonte stërvitjen me grupin. Mesfushori i Osijekut në Kroaci ishte projektuar si titullar për ndeshjen e së hënës me Norvegjinë, duke u konfirmuar si një prej më të besuarve të Panuçit, që kur ky i fundit ka marrë drejtimin e Shqipërisë. Për të mos rrezikuar një tjetër dëmtim, nuk është çudi që Grezda të mos stërvitet fare dhe të mungojë të hënën. Gjithsesi, në mungesë të gjakovarit 22- vjeçar, trajneri Panuçi ka gati "asin nën mëngë", teksa menjëherë dje i veshi jelekun e titullarit anësorit të Luftëtarit, Kristal Abazaj.
TITULLARËT - Me kalimin e ditëve, Panuçi po skarcon një e nga një dilemat që kishte rreth titullarëve, me të cilën do të zbresë nga minuta e parë në sfidën miqësore me Norvegjinë. Nga ajo që u la të
kuptohej nga seanca e pasdites së djeshme, italiani i kuqezinjve nuk ka më dilema rreth formacionit, me përjashtim të ndonjë dëmtimi të paparashikueshëm që mund të ndodhë gjatë seancave të mbetura. Pritet që Shqipëria të startojë ndaj Norvegjisë me
Strakoshën mes shtyllave, që fiton në këtë mënyrë duelin me Berishën. Mavraj dhe Ajeti do të luajnë në qendër të mbrojtjes, ndërsa nga krahët e këtij reparti Hysaj në të djathtë dhe Lenjani në të majtë. Në këto kushte, reparti difensiv duket i kompletuar, ndonëse Ajeti
dhe Lenjani konkurrojnë edhe në tri seancat stërvitore të mbetura përkatësisht me Gjimshitin (qendërmbrojtës) dhe Alijin (mbrojtës i majtë) për një vend. Ndërsa, mesfusha do të përbëhet nga Lilaj në qendër, Xhaka në të djathtë dhe Qaka i spostuar në krahun e majtë. Sa i përket sulmit, në mungesë të Grezdës do të luajë Abazaj, ndërsa në krahun e majtë pritet të spostohet Roshi. Ndërsa, në qendër të repartit ofensiv pritet të luajë Armando Sadiku. Të paktën ky ishte rreshtimi me skemën 4-3-3 që trajneri provoi në seancën e së premtes.
PROVAT - Italiani ka provuar disa formacione gjatë këtyre ditëve, por "bërthama" e skuadrës nuk ka ndryshuar asnjëherë. Mavraj, Hysaj, Xhaka, Qaka, Roshi dhe Grezda, për asnjë moment nuk kanë ndryshuar me lojtarët e tjerë jelekun e titullarit. Italiani ka pasur dyshime për mbrojtësin e majtë, të lënë bosh nga kapiteni Agolli, teksa disa herë i ka besuar Alijit dhe më së shumti Lenjanit, i cili duket se ka bindur trajnerin për t'i besuar një fanellë titullari. Teksa ka krijuar bindjen për Xhakën dhe Qakën, Panuçi ka provuar në mesfushë Ylber Ramadanin dhe më shpesh Sabjan Lilaj. Ky i fundit, me eksperiencën e tij dhe performancën në stërvitje, duket se ka bindur italianin për një fanellë titullari. Ndërsa me dy krahët e sigurt me Roshin dhe Grezdën (nëse ia del pas dëmtimit), Panuçi kishte problem vendin e qendërsulmuesit, ku në garë ishin Sadiku, Cikalleshi dhe Balaj. Edhe pse fillimisht u mendua se Sadiku ka luajtur shumë pak në Spanjë dhe nuk do të preferohej, Panuçi duket i bindur se elbasanasi duhet të startojë me Norvegjinë. Sulmuesi ka bërë paraqitje të mira gjatë këtyre ditëve, sidomos në ndeshjen e kontrollit, ku shkëlqeu me dy gola.