Gjermania paqe me Spanjën, nuk fal Brazili
Myler zhvlerëson Rodrigon, ndërsa Humels qan traversën
Dy kampionet e fun dit të botës përballë njëra-tjetrës dhe një spektakël në fushë që zgjat për të paktën 65 minuta, përpara se xhiroja e gjerë e zëvendësimeve t'i humbë ritmin ndeshjes. Gjithsesi, ajo që ofruan në fushë Gjermania dhe Spanja ishte më se e mjaftueshme për t'u konfirmuar dy pretendente për Botërorin 2018, edhe pse në fund, barazimi 1-1 i rri disi ngushtë të zotëve të shtëpisë, që qajnë një traversë me Humelsin, ndonëse edhe iberikasit gabuan një rast flagrant me Iskon, sërish në pjesën e dytë, që mund të ndryshonte fatin e ndeshjes. Rezultati i vendosur që në pjesën e parë pa Spanjën në avantazh shumë të shpejtë me Rodrigon dhe kundërpërgjigjen e Mylerit me një predhë nga distanca, e cila i lejon "pancerave" që të konfirmohen të pamposhtur prej 22 ndeshjesh me radhë dhe tashmë rekordi historik i Gjermanisë së Jup Dervall ( 23 takime pa humbje), i cili mbijeton prej 28 vitesh, është shumë më pranë. Madje, ai mund të barazohet që në miqësoren e radhës, të martën kundër Brazilit. Ndërsa, Spanja do i duhet të matë forcat me Argjentinën. DOPIO MAGJI
Spektakli ishte i garantuar sepse në fushë zbrisnin dy ndër pretendentet kryesore për Botërorin rus. Në "Esprit Arena", kampionët e botës në fuqi prisnin Spanjën dhe në Dyzeldorf nevojiten vetëm 6 minuta lojë për të zhbllokuar ndeshjen. Skuadra e Joakim Lëvit kapet në befasi shumë shpejt sepse Alba gjen Iniestën pranë zonës shumë të lirë dhe për yllin e Barçës është shumë e lehtë që të pikturojë një asist magjik për sulmuesin Rodrigo, i cili djeg në dalje Ter Shtegerin. "Pancerat" zgjohen menjëherë dhe mjaftojnë tre xhiro të kronimetrit për t'i shkuar pranë barazimit, por festimi i golit të Drakslerit mbetet në tentativë, pasi mbrojtja spanjolle largon sferën mbi vijën fatale. Spanja këmbëngul me zotërimin e topit, Iniesta i shkon pranë edhe dyfishimit me një goditje personale, por kur Gjermania fiton metra arrin që të bëjë keq, aq më shumë kur i jep hapësirë një "ujku" si Tomas Myles. Në të 35- ën, Khedira nga e majta gjen në pozicionin e duhur sulmuesin e Bajernit, i cili stopon në pozicion ballor dhe nga 25
metra lëshon të djathtën e pakapshme. Dy gola spektakolarë, njëri me aksion e tjetri personal, që mjaftojnë për fraksionin e parë të lojës, ndonëse vendësit qajnë edhe një rast shumë të pastër, me Hektorin, i cili mund të kishte vendosur përmbysjen, në pjesën e parë. TRAVERSË E MALLKUAR
Në pjesën e dytë, protagonist, siç ndodh shpeshherë në miqësore, është parakalimi i zëvendësimeve të shumta, që fatkeqësisht ulin jo pak ritmin e lojës, por ndërkohë, Gjermania, e shtyrë edhe nga publiku i saj e nis menjëherë në sulm,
pas daljes nga tuneli. Draksler, pas vetëm katër minutash lojë, detyron De Gean në një pritje madhështore, me portierin spanjoll që dërgon në goditje këndi. Spanja kundërpërgjigjet dhe ndoshta ka rastin më të artë të takimit, kur në të 57-ën, Isko i lëshuar i vetëm përballë
Ter Shtegenit sheh të hipnotizohet nga portieri gjerman dhe shpërdoron avantazhin e mundshëm. Të dy trajnerët provojnë të ndryshojnë diçka në fushë, Gyngogan, Sane, Gorecka e Gomez për gjermanët, Asensio, Kosta, Saul e Lukas për iberikasit,
por rrëmuja në fushë shtohet, loja humbet elasticitetin e saj, ndonëse në fund do të jenë "pancerat" që do të dalin me pengje nga stadiumi i Dyzeldorfit, kur Humels sheh golin e fitores të stampohet në traversë, pas një goditjeje me kokë.