Berisha driblon rivalitetin me Strakoshën: E di trajneri
Etrit Berisha është stërvitur rregullisht me grupin në seancat e fundit, por sërish mbetet në pikëpyetje për t'u aktivizuar të hënën ndaj Norvegjisë. Në konferencën e djeshme për shtyp, portieri i Atalantës foli për situatën në Kombëtare, të ardhmen dhe rivalitetin me Thoma Starkoshën për numrin një. "Jam në një periudhë që po rikuperohem nga një dëmtim. Unë ndihem mirë, por do të jetë stafi ai që do të vendosë nëse do të luaj apo jo ndaj Norvegjisë. Megjithatë, besoj se do të jem i gatshëm", theksoi fillimisht Berisha. SITUATA - "Seancat stërvitore kanë shkuar mirë dhe grupi është shumë i motivuar për të bërë mirë në këtë ndeshje. Jemi optimistë dhe besoj se do të vazhdojmë të tregojmë një formë të mirë. Ka kohë për të menduar për Izraelin dhe Skocinë sa i përket Ligës së Kombeve. Përqendrimi ynë për momentin është vetëm te sfida ndaj Norvegjisë, pasi duam të vazhdojmë të paraqitemi në të njëjtën mënyrë si ndaj Turqisë dhe të fitojmë. Skocia është një kundërshtar i vështirë ashtu si edhe Izraeli. Megjithatë, mendoj se e kemi forcën për t'i mposhtur këto dy përfaqësuese dhe për ta kaluar grupin", deklaroi portieri. RIVALITETI - Ndaj Norvegjisë pritet të luajë nga minuta e parë Starkosha, ndërsa i pyetur për rivalitetin me të, Berisha dha këtë përgjigje: "Strakoshën e njoh që nga koha që kam qenë te Lacio dhe gjithmonë kam pasur një marrëdhënie shumë të mirë me të. Gjëja më e mirë në Kombëtare është konkurrenca. Kushdo që të luaj, porta do të jetë e garantuar. Unë apo Strakosha? Është trajneri ai që vendos se kush do të luajë".