Brazil rekordesh, “pushton” Rusinë edhe pa Nejmarin
Mjaftojnë 45 minuta për të shënuar 3 gola në Moskë
Brazili konfirmohet një nga kandidatët potencialë për të fituar Botërorin "Rusi 2018". Pikërisht, në miqësoren kur të zotëve të shtëpisë që do të organizojnë këtë kompeticion, kombëtarja e Tites arriti t'u fitonte 0- 3 falë një ndeshjeje spektakolare në 45 minutat e dyta. Pa Nejmarin (i dëmtuar), trajneri zbret një formacion yjesh duke mos kursyer asnjë lojtar, me Alveshin e Marselon nga krahët dhe Tiago Silven dhe Mirandën në qendër. Kasemiro dhe Paulinjo ndërtonin "digën" përpara mbrojtjes, ndërsa Duglas Kosta, Uillian dhe Kutinjo ishin në mbështetje të Gabriel Zhezusit. Verdhejeshilët patën vështirësi në pjesën e parë, falë mbrojtjes së hekurt dhe vendosjes 3-5-1-1 të Rusisë. Portieri Akinfejev bëhet shpëtimtar në disa momente, ndërsa loja e Brazilit përqendrohet më shumë nga krahët, ku Dani Alvesh ishte në vështirësi dhe nuk kombinonte dot me Uillianin. Por "Seleçao" provoi të zhbllokonte ndeshjen falë goditjeve nga larg të Kutinjos dhe një depërtimi të Gabriel Zhezusit. Shumë pak për t'i bërë keq një portieri me eksperiencë si Akinfejev.
VIJNË GOLAT- Brazili nuk pajtohet me këtë rezultat dhe në pjesën e dytë rigjen menjëherë golin falë mbrojtësit të Interit, Miranda. Ai përfiton nga një gabim i portierit dhe i vetëm përballë portës nuk mund të gabojë. Brazilianët kalojnë në avantazh dhe tani janë më të qetë për ta goditur Rusinë në momente të tjera. Edhe vendësit reagojnë, duke vënë në provë portierin Alison, i cili ishte kapiteni i Brazilit mbrëmjen e djeshme. Tiago Silva dhe Miranda shpëtojnë një gol të sigurt, teksa në portën tjetër Paulinjo bën më të vështirin, duke ia përplasur topin në dorë portierit rus. Por, mesfushori i Barcelonës bëhet protagonist pak minuta më vonë kur fiton një penallti, e cila shndërrohet në gol nga Kutinjo. Vetëm 4 minuta më vonë, Paulinjo këtë herë shënon me kokë, pasi shërbehet nga Uillian. Brazili i Tites është në një moment spektakolar: 14 fitore në 18 ndeshje, vetëm 1 humbje. Ka arritur të shënojë 41 gola dhe të pësojë 5. Numra që bëjnë me shpresë tifozët për një Botëror si protagonistë dhe pse jo për një triumf...