Ankand për aksionet, ja kush kërkon Milanin
Mbi 10 mld $ pasuri, mbi "Djallin" katër pretendentë
Që nga ardhja në krye të Milanit, Jonghong Li ka qenë gjithnjë i rrethuar me vello misteri. Ardhjet e tij të pakta në Itali dhe drejtimi nga Kina e largët kanë bërë që çdo lajm mbi financat e tij të ngrejë një vorbull mediatike rreth klubit dhe skuadrës. Nëse tifozëria ka nisur të fitojë imunitet nga lajmet kontradiktore, mediat vazhdojnë të flasin për të ardhmen e klubit. Jonghong Li, nëpërmjet Marko Fasones, ka manifestuar një nevojë për të gjetur aksionerë, të cilët do të sillnin likuidet në arkat e klubit, por pa e lëvizur manjatin kinez nga karrigia e kreut. Me falimentimin e "Jie Ande", e quajtur ndryshe kasaforta e Jonghong Li, biznesmeni ka nisur të shohë për pretendentë të interesuar për blerjen e Milanit.
MUNDËSI - Alisher Usmanov është emri kryesor që synon kuqezinjtë. Pasuria prej 15 miliardë dollarësh dhe miqësitë me emra si Putin apo Pol Singer (kreu i fondit Elliot) mund të lehtësojnë ndjeshëm operacionin. Në rast se Jonghong Li nuk shlyen amerikanët e "Elliot" brenda afatit, Usmanov mund të jetë njeriu që do të marrë në dorë fatin e skuadrës milaneze. Për kronikë vlen të përmendet edhe zëdhënësi i industrialistit me origjinë nga Uzbekistani, i cili ka deklaruar se ndaj eprorit të tij kanë ardhur oferta blerjeje, por asnjëra prej tyre deri më sot nuk ka përmbajtur emrin e Milanit.
Kandidatët e tjerë - Interes në rritje gjatë orëve të fundit është edhe ai i Dimitrij Ribolovlev. Edhe ai rus me një pasuri mbi 10 miliardë dollarë, presidenti aktual i Monakos duket i joshur nga ideja e një emri në futbollin italian. Ka zëra se interesi i tij për Milanin është i hershëm dhe se aktualisht po mendon të shesë pikërisht Monakon për t'iu përkushtuar kuqezinjve. Ribolovlev është gjithmonë e më i përfshirë në futboll, pasi përveç ekipit të Principatës ka blerë edhe një skuadër belge. "Derbi" mes manjatëve rus ka edhe një rival tjetër. Në kuadër të një ankandi për pronësinë e Milanit në garë mund të hyjë edhe Said Al Falasi. Sheiku i përket një familje që, përveç naftës, e ka ngritur pasurinë duke u marrë edhe me prona të patundshme. I fundit, por me siguri jo nga rëndësia është edhe një tjetër fond amerikan
i interesuar të investojë në sportin europian. Fondi në fjalë vepron me parametrat e "Elliot" dhe mbështetet nga bankat kryesore amerikane, çka mund të lehtësojë shitjen në nivel burokracie dhe bashkëpunimi mes institucionesh me qendër përtej oqeanit.