Kthehet Ngoo, qetësohet Tirana

Ze Maria i beson një vend titullari, anglezi merr në dorëzim sulmin bardheblu

Pas një jave mungesë në stërvitje dhe zhurmës që shkaktoi prej dënimit për shpërndarje droge, Majkëll Ngoo rikthehet në Shqipëri. Anglezi më në fund zbarkoi në kryeqytet dhe rrjedhimisht u vendos nën urdhrat e Ze Marias. Duke hedhur pas krahëve problemet me ligjin, tashmë sulmuesi është përqendruar te futbolli i luajtur. Edhe pse ka fare pak ditë në dispozicion për t'u stërvitur dhe përshtatur me skemat që pjesa tjetër e grupit ka aplikuar në 7 ditët e fundit, atij do t'i besohet sërish një fanellë titullari. Të paktën, kjo u kuptua nga loja e zhvilluar dje brenda llojit, pasi nuk përjashtohet mundësia e ndonjë surprize prej Ze Marias. Ky i fundit shpeshherë ka dëshmuar që në fushë hedh vetëm ata që japin maksimumin gjatë javës. Megjithatë, kur dihet që këtë herë i mungon "bomberi" Junus Sentamu (i pezulluar prej të verdhëve dhe i grumbulluar nga Uganda), është i kushtëzuar që sulmin dhe golat t'ia besojë pikërisht Ngoosë. Në kësi kushtesh, anglezit i mbetet për detyrë që të japë më shumë se 100%, që të përmbushë pritshmëritë, jo vetëm të stafit teknik dhe klubit, por edhe të pjesës tjetër të skuadrës, që prej ditësh janë angazhuar maksimalisht te

seancat përgatitore.

DILEMAT - Mendohet që në fushë ndaj Apolonisë të zbresë një formacion deri diku i ngjashëm me atë të Tomorit. Ndryshimet dhe dilemat më të mëdha nisin nga porta dhe përfundojnë te sulmi. Ilion Lika ka fare pak

shanse që të luajë, ndaj gjasat janë që njeri mes Abibit dhe Çalit të mbrojë katërkëndorin, megjithatë fjala e fundit do të jepet sot. Krahët u mbeten Kërçikut e Hoxhallarit, ndërsa në qendër nuk dihet ende nëse do të rikthehet apo jo Turtulli. Nëse Ze Maria

e lë sërish jashtë, atëherë do të luajnë Cake me Bishajn. Mesfusha i mbetet treshes kaliske Daja-Karabeci-Maveje, sakaq vendin e Sentamusë mund ta zërë Grent Halili që ka bërë paraqitje të mira në dy javët e fundit, ndërsa në krahun tjetër mbetet Greca.