Angli-Itali, sa shumë diferenca në fushë
Kombëtarja e Sauthgejtit superiore edhe në nivelin teknik, por a do mjaftojë në Rusi?
Luanët nuk kanë qenë kurrë kaq të shtrenjtë. Jemi në kohët e merkatos së çmendur, por Anglia, e cila do të presë sot Italinë në "Wembley", mund të mburret me "gurët e saj të çmuar në kurorë" si rrallë në të shkuarën. Kundër "axurrëve" nuk do të jetë Kejn, një emër që këtë verë mund të transferohet për 200 milionë euro. Por, tredhëmbëshi që luajti kundër Holandës në miqësoren e fundit, Sterling-Rashford-Lingard, i kalon me lehtësi 150 milionë eurot (80-50-25 milionë euro është vlera e kartonit të tyre e llogaritur nga portali i specializuar "Transfermarkt"). Dhe trios së sulmit të Mançesterit i duhet shtuar edhe Dele Ali, i cili e nis ankandin me një vlerë dysheme prej 80 milionë eurosh, por edhe pankinari i Sitit, Stons, i cili nuk zbret nën 50 milionë (ashtu si shoku i skuadrës Uoker) dhe ylli i tretë i Spërsave, Daier, i cili i afrohet 40 milionëve dhe thellon diferencat me talentet e Di Biaxhos.
ITALIA SHUMË MBRAPA - Mes yjeve të Italisë në krye është Verrati, i vlerësuar me 70 milionë euro, fryt i spekulimeve për një transferim te Barcelona sezonet e fundit, Beloti që i afrohet 100 milionë eurove për shkak të klauzolës, Donaruma te 40 milionët dhe Insinje 60. Me pak fjalë, Italia gjendet prapa në këtë krahasim
në letër, por edhe në renditjen e FIFA-s, atje ku ka zbritur në vendin e 20-të. Por, a do t'u mjaftojë anglezëve ky avantazh, përveç faktorit fushë për të vazhduar lundrimin e tyre të qetë drejt Rusisë?
REZULTATET - Në Londër janë të interesuar të dinë nëse
e gjithë kjo vlerë e kësaj skuadre mund të përkthehet në fushë, e cila do t'i lejonte "Tre Luanëve" që të shkonte përtej çerekfinaleve, në të cilët është ndalur brezi i artë i Xherrardit, Lampardit, Bekhamit dhe Runit me shokë. Anglia nuk shkon në një gjysmëfinale që prej vitit 1996 (Europianit të shtëpisë) dhe Botërorit të 1990. Sauthgejt ka shkëputur çdo lidhje me të shkuarën: edhe moduli që po punon, risia 3-4-3 është i karakterizuar nga shpejtësia dhe loja sulmuese. Porta mbetet një enigmë, ndërsa në mesfushë duhet gjetur një sintezë mes cilësisë
së Dele Alit, forcës së Daierit, gjeometrisë së Hendersonit dhe ndoshta shpikjeve të Lalanës. Nëse Kejn, ashtu siç duket, do të riaftësohet për Rusinë, goli nuk duhet të jetë një problem (rezerva e parë është Vardi). Në mbrojtje, Guardiola ka përmirësuar Uokerin dhe Stonsin. Pastaj është edhe ajo statistika e painjorueshme e teknikut katalanas: në 2012 kur stërviste në Spanjë, "La Roja" fitoi Botërorin me bllokun e Barçës, në 2014 kur klubi i tij ishte gjerman, "Pancerat" triumfuan me kontributin e lojtarëve të Bajernit.