Liçaj nuk ndalet: Gjika bënte merkaton
“Ishte detyrë e klubit të operonte djalin tim futbollist”
Ish- trajneri i suksesshëm i Flamurtarit, Edmond Liçaj, në një intervistë për "Panorama Sport", i ka kthyer përgjigje ish- kryebashkiakut Gjika për akuzat në drejtim të tij. Ai u shpreh se Gjika nuk mund të përmendë humanizmin, ndërsa e kishte detyrë pagesën e operacionit, pasi, siç thekson, djali i tij ishte futbollist i Flamurtarit.
Profesor Liçaj, cili është reagimi juaj pas deklaratës së ish- presidentit të Flamurtarit, Shpëtim Gjika?
Unë u referohem fakteve. Ajo që dhashë për gazetën tuaj, ishte një intervistë për 90-vjetorin e klubit dhe unë kam qenë pjesë aktive, ku shpreha mendimin tim. Rezultatet e vërtetojnë këtë gjë. Me përjashtim të një viti, Flamurtari i madh ka qenë gjithmonë në ato ujëra për të dalë nga kategoria apo fundi i tabelës. Menaxhimin unë e quaj universal, përfshi merkaton dhe strategjinë. Asnjëherë Flamurtari nuk u bë ekip për të pretenduar në kampionatin tonë. Ky nuk është faji im. Një vit që isha drejtor teknik, isha pak i tërhequr, për shkak të problemeve që ishin dhe më vonë e mora ekipin të ndërtuar si trajner.
Megjithatë, ish- kryebashkiaku ka thënë se edhe ju keni përgjegjësi, pasi keni qenë drejtor teknik...
Unë, kur isha drejtor teknik, u shkoja në ndihmë trajnerëve në pankinë, meqë edhe ma kërkonin. Asnjëherë nuk kam marrë pjesë në nxjerrjen dhe futjen e lojtarëve në fushë, por aprovoja trajnerin dhe shkoja për ndihmë. Asnjëherë nuk u
kam thënë fusni njërin apo tjetrin. U referohemi fakteve që kanë ndodhur për merkaton.
Por, keni qenë edhe trajner i ekipit apo jo?
Trajner unë kam hyrë në mes të kampionatit për rezultate të dobëta të trajnerit të mëparshëm dhe jam ndeshur me 5 ekipet më të forta dhe pretendente, duke filluar nga Elbasani, Peqini, Shkodra, Dinamo, Tirana, Kavaja, që ishin 1-3 pikë nga njëra- tjetra. Flamurtari u afrua dhe mua më vjen mirë për punën që u bë. Por të thotë një njeri të shkarkohesh
tani, është pa sens, në një kohë që në 11 ndeshje kishte marrë 10 pikë ose 11 pikë dhe në 8 ndeshje me mua trajner mori 9 pikë dhe u afrua me kreun në distancë pikësh. Nëse distanca nga kreu ishte 10 pikë u afrua me 7 apo 8.
Ju kërkuat përforcime, cila ishte përgjigjja që morët nga Gjika?
Kërkova 4- 5 futbollistë për të ecur ekipi. Mes tyre kërkova edhe djalin tim, pasi unë kam idenë time për futbollin, pasi futbolli bëhet me mbështetje të gjithëanshme dhe financiare, me filozofi.
Përgjigjen e ka kthyer shumë mirë Sokol Kushta sot (dje), një ndër legjendat e ekipit vlonjat. Gjika nuk duhet të kthente përgjigje për këto gjëra, por për ato që i takon për pjesën e tij sa ka drejtuar ekipin. Megjithëse synimi i thënë edhe nga presidenti edhe nga shefi i klubit ishte që të bënim ekipin. Unë, për hir të futbollit të Vlorës, nuk mora pjesë as në kontratën time, por u thashë bëjeni vetë. Kontratën e kishin bërë jashtë rregullave, të cilën unë e mora pasi isha shkarkuar. Më shkarkoi pa të drejtë. Ishte një kontratë e parregullt,
pasi me ligj nuk lejohet një kontratë 6- mujore. Aq më shumë kur kërkon nga një trajner që të të bëjë ekipin dhe kryesisht me vlonjatë. Unë jam shumë i dhënë pas vlonjatëve, edhe si trajner i kombëtareve që kam drejtuar, pasi e njihja cilësinë e futbollit të Vlorës, mentalitetin në arenën ndërkombëtare.
Keni një përgjigje për ish- presidentin, i cili deklaroi se ju shkarkoi për rezultate të dobëta?
Unë i paaftë? Lojtarët që kam kapur unë me dorë, kanë qenë titullarë të ekipeve Kombëtare, që nga Ervin Skela, Geri Çipi, Ervin Fakaj, që nga brezi i parë e deri te brezi dytë, nga viti 1972 dhe 1976. Shpesh më vijnë prindër që kanë fëmijë jashtë dhe duke besuar tek unë, m'i sjellin që t'u jap mendim dhe unë i bie drejt sepse futbolli është profesion. As Shpëtimi dhe asnjeri nuk e fshin dot historisë. Në 95 vjet unë kam qenë trajneri më i titulluar, asnjë nuk e fshin dot historinë. Kam tre trofe, dy herë ekipi me mua ka shkuar në finalen e Kupës së Shqipërisë brenda dy vitesh. Kur shkova unë, Flamurtari ishte në vendin e 9-të dhe kishte marrë tatëpjetën për dënimet që ishin bërë nga FSHF-ja, i ishin bërë dy dënime, plus një i tretë për ngjarjet në Islandë. Mua më vjen mirë që u morr Kupa, më vjen mirë që ishte trajneri Memushi që e kam pasur lojtar kyç në ato vite kur drejtoja Flamurtarin.
Por, ai thotë se në skuadrën që drejtonit ju nuk kishte lojtarë vendës...
Shpëtim Gjika nuk mund të bëhet trajner. Ky është profesion dhe seleksionimi është shumë i rëndësishëm. Pasi duhet parë sesi mund të funksionojë me të rinjtë ekipi, por edhe mund të mos funksionojë. Atëherë kishte
vlonjatë, ndërsa sot jo. Përgatitja e futbollistëve është kryesore. U abuzua shumë në kampionat në ato vite.
Ju ka përmendur edhe pagesën e operacionit për djalin tuaj...
Ka bërë gabim që e ka përmendur djalin. Siç tha edhe Kushta sot (dje), është gjest humanitar dhe nuk mund të përmendet. Në karrierën time kam bërë shumë vepra humanitare dhe kam ndihmuar, por nuk i kam përmendur kurrë. Shpëtim Gjika djalin tim e kishte lojtar në ekip dhe e kishte për detyrë t'i përgjigjej, siç ka bërë edhe me të tjerët që janë operuar në gju, apo për të tjera ndërhyrje.
Si e shikoni këtë Flamurtar?
Ekipi ka funksionuar mirë. Vinte nga një periudhë e errët dhe shkoi në vendin e dytë. Sistemi është trepikësh, ekipi ka mundësi, por të mos kthehet koka pas.
Pse mendoni se janë arritur këto rezultate?
Një nga dështimet, mungesa e portierit dhe filozofia. Ekipet që vijnë tani në Vlorë, nuk luajnë njësoj si në pjesën e parë, por vijnë më të lira, sulmojnë më shumë. Stafi ka zgjedhur në merkaton e janarit, por nuk i ka aktivizuar sa duhet.
E shikoni të dështuar merkaton e janarit?
Nuk mund të them dështim në kuptimin e plotë të fjalës, sepse trajneri dhe stafi i njeh shumë mirë. Besoj i ka marrë për të ndjekur një filozofi tjetër sidomos në ndeshjet në Vlorë, sepse duhen lojtarë cilësorë dhe ta çojnë topin përpara. Këtu ka hasur vështirësi sepse nuk kanë funksionuar lojtarët cilësorë.
Mendoni se janë të arritshme Kupat e Europës?
Kupat e Europës janë të arritshme sepse sistemi trepikësh e lejon.