Juventus-Milan, Anjeli: Nuk dua barazim
“Na pret një e ardhme e ndritur, duhet vetëm durim. Forma e skuadrës falë Gatuzos”
Marko Fasone, për të qetësuar ambientin e trazuar për çështjet e të ardhmes së klubit, ndërhyn dhe sqaron gjithçka përmes mikrofonave të "Sky". "Milani ka nisur procesin e tij të rritjes, duke nisur nga një vit më parë. Është e qartë që rreth nesh ka një vëmendje mediatike të jashtëzakonshme në nivel kombëtar dhe ndërkombëtar. Ajo që mund të t'u them tifozëve është që projektet që kanë nisur në prill 2017 janë duke ecur sipas planit, si në planin sportiv, ashtu edhe në atë menaxhues. Klubi po ecën përpara shumë mirë", tha administratori i deleguar i kuqezinjve. "Madje, po shkojmë pak më mirë se sa buxheti me të gjitha projektet. E ardhmja në këndvështrimin tim është e ndritur. Po e menaxhojmë mirë klubin. Duhet kohë, durim dhe rezultatet nuk do të vijnë kurrë në vitin e parë kur bëhet një revolucion i tillë".
SFIDA ME JUVEN - Fasone ndalet të flasë edhe për supersfidën e së shtunës në Torino kundër Juventusit: "Është shumë bukur të mbërrish në një sfidë të jashtëzakonshme si ajo kundër Juventusit në të tilla kushte. Nëse do të kthehemi në kohën e Krishtlindjeve, kur vinim pas disa humbjeve djegëse, si ajo me Veronën dhe Atalantën dhe me disa ndeshje me lojë të dobët. Në ato momente ishim më shumë poshtë një treni sesa të aftë për të parë me optimizëm nga e ardhmja". Dhe merita për formën që po kalon skuadra i shkon trajnerit Xhenaro Gatuzo sipas drejtuesit të klubit: "Duhet t'ia njohim meritat e mëdha Gatuzos dhe Mirabelit që më dha kurajën për të bërë atë zgjedhje në atë moment. Rezultatet janë të shkëlqyera, klima rreth skuadrës ka ndryshuar absolutisht. Ka optimizëm dhe besim". Dhe një koment shkon edhe për kapitenin Bonuçi: "E dimë të gjithë se sa e rëndësishme do të jetë për të kjo ndeshje. Do të jetë një sfidë e bukur për të gjithë, por për të do të jetë veçanërisht speciale. Në këtë moment e dimë që në çdo ndeshje duhet të japim maksimumin për të marrë rezultatin. Nuk duhet ta humbasim distancën. Kjo përmbysje, që dukej e pamundur, sot është më e besueshme dhe duhet ta shfrytëzojmë në maksimum. E dimë që të luash në Torino, është e vështirë, ata kanë edhe diçka më tepër se ne, por ne duhet të japim gjithçka dhe pas minutës së 90-të të shohim".