Grumbullim në Zvicër, Shqipëria sfidon Ukrainën në qershor
Shqipëria ka lënë pas humbjen në miqësoren ndaj Norvegjisë dhe tashmë është duke menduar për grumbullimin e ardhshëm. Plot 2 muaj më vonë, më 26 maj, Kombëtarja kuqezi do të zhvillojë një tjetër grumbullim, kësaj here në Zvicër. Pas 3 ditësh përgatitje, skuadra e Panuçit do të zhvillojë testin e parë miqësor. Kundërshtari për këtë test miqësor nuk është gjetur ende, teksa Federata Shqiptare e Futbollit është duke biseduar me disa federata të tjera për të caktuar një test miqësor në datën 29 maj. Pas miqësores në 29 maj, kuqezinjtë do të zhvillojnë një test tjetër ndaj Ukrainës. "Një prej miqësoreve është vendosur. Njëra është e sigurt, por duhet që ta bëjë zyrtare federata. Po presim konfirmimin për miqësoren tjetër, të parën në radhë, pasi e dyta jua thashë që është tashmë e vendosur", deklaroi trajneri Kristian Panuçi gjatë konferencës për shtyp. Kjo përballje është planifikuar të zhvillohet më 2 qershor. Kujtojmë që me Kombëtaren, që tashmë drejtohet nga Shevçenko, Shqipëria është përballur së fundmi në takimin e zhvilluar në Bergamo të Italisë më 3 qershor të vitit 2016, kur skuadra ukrainase triumfoi me rezultatin 1-3. Do të jetë fundsezoni, por për kuqezinjtë do të kenë ndeshje shumë të rëndësishme,
pasi në shtator starton kompeticioni i Ligës së Kombeve, ku ndeshjet do të jenë me vlerë pikësh. Fakti që përballë do të jenë dy skuadra të kualifikuara në Botërorin "Rusi 2018", do të duhet të shfrytëzohet si test real për të matur forcat përpara se kuqezinjtë të përballen me Skocinë dhe Izraelin.