Historike, Kosova U-21 ndal kampionët e Gjermanisë

Historike! Kosova U-21 ndal Gjermaninë kampione në fuqi të Europës për këtë grupmoshë. Në ndeshjen e zhvilluar dje në stadiumin "Adem Jashari" të Mitrovicës, dardanët e rinj kanë befasuar me lojën e tyre, duke u marrë në fund një pikë gjermanëve falë barazimit pa gola. Ky rezultat historik vjen në përfaqësimin e parë të Kosovës në eliminatorët e Europianit U-21. Madje, ekipi i drejtuar nga Rafet Prekzai i ka pasur rastet edhe për ta fituar ndeshjen. Kosova U-21 kishte humbur me rezultatin minimal 1-0 nga Gjermania në ndeshjen e parë, por dje dardanët u treguan shumë të fortë, duke përballuar lojtarë që janë pjesë e klubeve të Bundesligës. Falë këtij barazimi, Kosova mbetet ende në garë për t'u kualifikuar në Europianin 2019, teksa ruan vendin e dytë me 11 pikë. Ndërsa Gjermania është e para me 16 pikë. Rezultatet e Kosovës U-21 dhe U-19 janë një leksion edhe për Shqipërinë, që në këtë moment është si mos më keq me këto grupmosha.

TRAJNERËT - Rafet Prekazi është arkitekti i suksesit të

Kosovës U-21. Pas ndeshjes, trajneri mitrovicas ka përgëzuar futbollistët, duke i konsideruar si heronj të këtij vendi. "Dihet që jemi Kosova, ndërsa Gjermania kampione. Por, lojtarët kanë luajtur me zemër dhe gjakftohtë. Ekipi ynë ka kualitet, por duhet të përmirësohemi

më shumë. Na mungon ende përvoja e ndeshjeve ndërkombëtare. Sidoqoftë, jam krenar me këta djem që e japin 200% në fushë. Këta djem janë fenomenalë. Kështu luftohet për shtetin tënd", deklaroi Prekazi. Ndërsa trajneri i Gjermanisë, Stefan Kuntz, u shpreh: "Prisnim ndeshje të vështirë, por jo këtë rezultat. Kosova u angazhua jashtëzakonisht shumë dhe kjo bëri që të mos fitonim. Barazimi ishte i drejtë".