"Gati për Tiranën, do luajmë më fort se në Fier"
Gjatë gjithë kohës është përpjekur dhe ka mundur "me shpirt ndër dhëmbë" ta mbajë ekipin e tij, aq modest në pamje të jashtme, larg presionit të "tollovisë" futbollistike. Sepse ai, trajneri i Apolonisë, nuk do që skuadra e tij të dëgjojë paragjykimet, por të përqendrohet në fushën e lojës. Ndriçim Kashami është i gjithi i përqendruar te ndeshja e kësaj jave, atë që do të luajnë sot në kryeqytet. Dhe duket se ambicia nuk i mungon as për këtë duel, ndërsa hapur thotë që do të tentojnë që të marrin fitoren ndaj kryesuesve dhe rihapin edhe një herë vallen për vendin e parë. "Nuk ka mbaruar kampionati për ne. Jemi në rrugën e duhur dhe mund të ishim më mirë nëse disa gjëra do i kishim bërë ndryshe. Megjithatë, nuk po i futem kësaj historie, pasi nuk do të doja të kaloja në përsëritje. Ama, ne jemi Apolonia dhe mbase duhet ta risjell në vëmendje frazën e parë që kam thënë kur mora drejtimin e kësaj skuadre: 'Do bëjmë maksimumin dhe do jemi minimalisht ndër 3 të parat!'. Pra, jemi në pozicion minimal, mos harroni ç'kam thënë!", tha fillimisht numri një i pankinës bardhejeshile në deklaratën e dhënë për "Panorama Sport". Ai tregon edhe "recetën" që do të vendosë në zbatim ndaj bardhebluve dhe mbi të gjithë rithekson se nuk luajnë për llogari të askujt. "Me Tiranën? Jemi gati. Grintë, besim e lojë të kujdesshme. Ne jemi Apolonia, do luajmë edhe më fort se në Fier. Për vete e jo për llogari të tjetërkujt, këtë e kanë të qartë të gjitha ekipet. Jemi në vazhdën e misionit tonë, të dëshmisë se jemi ekipi më korrekt i kompeticionit", përfundoi trajneri.