“Tirona Fanatics”: Nuk na duan, i qëndrojmë bojkotit
"Tirona Fanatics" ka pasur një takim me zyrtarë të Drejtorisë së Policisë për të zgjidhur çështjen e kartave të identitetit që kërkohen në aktivitetet sportive tashmë. Ky rregull absurd, i cilësuar prej tifozëve, ka bërë që t'i bojkotojnë ndeshjet. Në një reagim në "Facebook", ata kanë deklaruar se lista me personat e padëshiruar nga ana e policisë është e papranueshme dhe gjithashtu akuzojnë klubin se nuk i do tifozët e tij. Më poshtë, reagimi i plotë. "Përfaqësues të 'Tirona Fanatics' kanë qenë dje në takim me zyrtarë të Drejtorisë së Policisë për të diskutuar rreth problematikave të hasura në ndeshjet e fundit.
Kërkesa e policisë për kartë identiteti për tifozërinë tonë (Kërkesë kjo në të gjithë trojet shqiptare vetëm për tifozët e Tironës) dhe seleksionimi brenda saj kanë qenë tejet shqetësuese si për tifogrupin, ashtu edhe për tifozët e Tironës.
Në takim na u komunikua se një nga problemet fillestare të kërkesës së ID ishin gjobat e papaguara të 15 anëtarëve 'Fanatics' që, sipas Policisë së Shtetit, ishin artikuluar më datë 30.10.2017. pas përfundimit të ndeshjes Kb Tirana-Kb Partizani në basketboll. Këta tifozë NUK janë ndaluar gjatë aktivitetit të ndeshjes dhe përzgjedhja e tyre është totalisht e PAPRANUESHME! Sot kanë qenë në lista me mbi 60 emra, të cilët ishin të kategorizuar si: 1-Tifozë të gjobitur. 2-Tifozë të padëshiruar (të fotografuar individualisht). 3-Tifozë për t'u shoqëruar në komisariat në momentin që policia i identifikon. KJO ËSHTË QESHARAKE! Asnjë klub nuk mund të mos reagojë në të tillë situatë, përveç atij klubi që nuk i do tifozët e tij. Gjithashtu, ping-pongu që luan Policia e Shtetit me zyrtarët e Kb Tiranës për t'iu shmangur përgjegjësisë është i papranueshëm! Mundësitë që ka pasur Kb Tirana për t'i pasur tifozët sot në krah nuk kanë qenë të pakta, por çuditërisht Kb Tirana nuk ka denjuar të lëvizë asnjë nga mundësitë që kishte për të bërë të mundur hyrjen e tifozëve pa kartat e identitetit. Ndoshta klubi nuk i do tifozët ose ndoshta i sheh ata si problem, por ne i bëjmë me dije (në qoftë se nuk janë të vetëdijshëm) që, ju nuk jeni asnjë gjë tjetër, vetëm disa njerëz me fat që ju është mundësuar të përfaqësoni ngjyrat e shenjta të Tironës dhe thjesht kalimtarë tejet të panevojshëm. Tifozëria bardheblu është ajo që është, e përjetshme! 'Tirona Fanatics' do të jetë prezent në vazhdimësi vetëm në ndeshjet që karta e identitetit nuk do të kërkohet deri në zgjidhjen përfundimtare të këtij problemi! Nisim përgatitjet për transfertën e Ballshit më datë 7, si një transfertë decizive në fund të këtij sezoni të urryer!"