Lacios i vjedhin 2 milionë euro me e-mail fals
Një person në Holandë kishte kopjuar adresën e e-mailit
Një shaka 2 milionë euroshe. Ose më mirë një mashtrim që vlen 2 milionë euro. Dhe "viktima" është skuadra e Lacios dhe presidenti Klaudio Lotito. Gjithçka i referohet tratativës për transferimin e mbrojtësit Stefan De Vraj nga Fejnordi në kryeqytetin italian në verën e vitit 2014. Në atë kohë, një transferim i tillë u konsiderua si një nga goditjet më të mëdha që bëri Igli Tare në merkato.
Mashtrimi- Sipas lajmit të publikuar nga "Il Tempo", një "hacker" ka krijuar një e-mail fals të njëjtë me atë të Fejnordit dhe ka komunikuar në momentet e fundit të tratativës me drejtuesit e Lacios, duke u dërguar atyre një numër llogarie bankare, ku duhet të depozitoheshin 2 milionë euro. Në total, Igli Tare e arriti marrëveshjen për 8.5 milionë euro dhe Lacio duhet të paguante për kartonin e lojtarit. Nga llogaritjet e bëra rezultonte se në arkat e klubit holandez nuk kishin mbërritur 2 milionë euro dhe duket se arsyeja është ndërhyrja e piratëve. Në fazën përfundimtare të përfundimit të marrëveshjes, Lacio bëri depozitën në disa këste, por ai i fundit ishte bërë në një llogari që nuk përkonte me atë zyrtaren e Fejnordit. Llogaria bankare ishte e një të panjohuri, i cili kishte ndërhyrë në rrjet dhe në komunikimin mes dy skuadrave duke bërë që të vidhte në njëfarë mënyre 2 milionë euro nga skuadra italiane. Deri tani është zbuluar se ky person jeton në Holandë, por ende nuk është identifikuar. Megjithatë, hetimi duket se ka arritur në fazën përfundimtare dhe organet po punojnë për zbardhen e kësaj ngjarjeje.
Interi - Zbulimi përfundimtar i mashtrimit të bërë në
këtë histori do të qetësonte pak Lacion që këtë verë do ta humbasë mbrojtësin De Vraj dhe nuk do të përfitojë asnjë milion euro. Atij i përfundon kontrata dhe nuk gjeti gjuhën e përbashkët me Taren për ta rinovuar, ndërsa mediat bëjnë me dije se ka arritur marrëveshjen
me skuadrën e Interit. Zikaltrit kanë nisur një revolucion të heshtur dhe po tentojnë lojtarët, të cilëve u përfundon kontrata. Mes tyre edhe Azamoah duket se është drejt transferimit në Milano. Objektivi aktual është Bernard i Shahtjorit, por fillimisht zikaltrit
duhet të gjejnë personin, të cilit do t'i besohet roli i drejtorit teknik, pas largimit të Sabatinit. Skuadra gjithashtu ka hedhur vështrimin edhe nga Lajpcigu ku do të tentohet transferimi i sulmuesit Forsberg, i cili ishte një nga zbulimet në sezonin që lamë pas.