Panuçi e nis si Brigel, në 6 ndeshje askush si De Biazi

Statistikat/ Starti i trajnerëve të huaj të Kombëtares

Në erën "Duka" në drejtimin e FSHF-së, trajnerët e huaj kanë qenë të shumtë në krye të përfaqësueses. Më saktë, kanë qenë të gjithë të tillë dhe në numër, Panuçi është i nënti nga stafeta e nisur prej Dosenës. Mirëpo, Dosena, Slavko Kovaçiç dhe Mustedanagiç kanë qëndruar fare pak në drejtim. Për këtë arsye, "Panorama Sport" ka marrë në konsideratë startin e 6 trajnerëve të huaj, duke krahasuar 6 ndeshjet e para në krye të Kombëtares. PËRSËRITËSI PANUÇI - Fitoret janë ato që vlejnë dhe Panuçi ka vetëm dy të tilla në gjashtë takimet e para. Me një golavarazh negativ (-2) falë gjashtë të shënuarve dhe tetë të pësuarve, italiani ka triumfuar me Lihtenshtejnin dhe Turqinë, ka barazuar ndaj Maqedonisë dhe ka regjistruar tri humbje (Spanjë, Itali dhe Norvegji). Me këtë start, në krye të kuqezinjve është prezantuar edhe gjermani Hans-Peter Brigel. Diferenca e këtij të fundit me Panuçin është golavarazhi, pasi kuqezinjtë e drejtuar nga Brigel kanë shënuar 11 dhe pësuar tetë. Me tri humbje ka startuar edhe Oto Bariç, i cili ka marrë vetëm një fitore dhe dy barazime në gjashtë të parat. Gjithashtu, golavarazhi negativ (-1), gjashtë të shënuar dhe shtatë të pësuar. DY HUMBJE - Ari Han dhe Josip Kuzhe kanë startuar me nga dy humbje. I pari, me ndarje të barabartë: 2 fitore, 2 barazime dhe dy humbje me golavarazhin 5-3. I ndjeri Kuzhe startoi në krye të Shqipërisë me një fitore, 3 barazime dhe dy humbje, si dhe golavarazhin pozitiv, 10-9. ASKUSH SI DE BIAZI - Jo për kualifikimin në Europian, por për startin, Xhani De Biazi është i vetmi që ka marrë 3 fitore në nisje, shoqëruar me një barazim dhe dy humbje. Golavarazhi pozitiv, me shtatë të shënuar dhe një më pak në listën e të pësuarve. Pjesa tjetër e drejtimit të tij të kuqezinjve është histori…