Ndryshon Partizani, Abdurrahimi titullar
Luhet me tre sulmues të deklaruar, duhet fitore me Kamzën
Nga dje, Partizani ka ndezur "motorët" dhe të gjitha energjitë janë përqendruar te takimi i radhës ndaj Kamzës. Edhe pse është ende herët për të provuar formacionin, pasi ndeshja do të luhet të dielën, në stërvitjen e djeshme trajneri Dalipi ka krijuar një ide për formacionin që do të hedhë në fushë nga minuta e parë. Një ndryshim që ka rënë në sy, ishte vendosja e sulmuesit të ardhur në merkaton e janarit, Besart Abdurrahimi, në vijën e parë të sulmit që nga minuta e parë, gjë e cila nuk kishte ndodhur deri në këto momente. Abdurrahimi ka zënë kështu vendin e Bardhit, që ka luajtur si sulmuesi i parë në skuadër. Por, nuk dihet nëse dje Dalipi ka bërë një zgjedhje të tillë, për shkak se Bardhi është kthyer nga Sllovakia ku ishte i grumbulluar më Shpresat. Por, nuk përjashtohet mundësia që Abdurrahimi të jetë titullar, duke parë eksperiencën dhe vlerësimin që ka marrë nga stafi teknik në momentin që është afruar te Partizani. Arsyeja përse ai nuk ishte aktivizuar në këto momente, kishte të bënte me rifitimin e formës optimale, të cilën duket se ka marrë dhe është gati për të qenë titullar. Por, një ide më të qartë në lidhje me formacionin në pjesën e sulmit do të ketë gjatë seancës stërvitore të së premtes.
RRESHTIMI - Prapavija e të kuqve në këtë ndeshje nuk pritet të ndryshojë. Hoxha në portë dhe para tij në qendër pritet të jenë Gojkoviviç dhe Belica, ndërsa nga krahët Ibrahimi dhe Kotobelli. Në mesfushë do të jenë të vendosur tre futbollistë, ku Trashi dhe Batha kanë të sigurt formacionin, ndërsa Esat Mala do u bashkëngjitet. Mesfushori ka arritur të fitojë "duelin" me Telushin që është rikthyer pas formacionit dhe kjo ndeshje do të jetë një provë për të bindur trajnerin Dalipi për të
ardhmen, edhe pse deri më tani Mala ka bërë paraqitje shumë të mira. Në sulm nuk do të ketë dyshime sa u takon dy emrave, ku Asani dhe Progni do të vazhdojnë të jenë në formacion dhe, më shumë gjasa, do t'u bashkëngjitet edhe Abdurrahimi.