Lushnja, Papa sytë nga Gjyla: Gati si sulmues i dytë!
Lushnjarët vijojnë javën e dytë të përgatitjeve në kuadrin e ndeshjes me Luftëtarin që do të luhet ditën e diel në stadiumin "Gjirokastra". Në çdo javë të kampionatit, verdhejeshilët janë shoqëruar nga mungesat e shumta, por për këtë ndeshje skuadra që tashmë drejtohet nga Ilir Gjyla do të ketë një numër rekord mungesash. Mesfushori Orgest Gava është i skualifikuar, pasi ka plotësuar numrin katër të kartonëve të verdhë. Mbrojtësit Erjon Xhafa dhe Kristi Marku, së bashku me mesfushorin Erlind Korreshi nuk janë ende gati pas dëmtimeve të pësuara vitin e kaluar. Ndërkohë që do të mungojë edhe mbrojtësi Franci Bufasi, i cili u dëmtua në ndeshjen me Teutën. Shtatlarti nuk ka dalë ende në stërvitje, pasi ka thyer klavikulën. Një mungesë tjetër është ajo e sulmuesit Mikel Canka, që është dëmtuar një javë më parë në stërvitje. Canka ka një zgjatje të ligamentit. Edhe sulmuesi 31-vjeçar nuk ka dalë ende në stërvitje.
FANTAZISTI
Mesfushori Enriko Papa flet në prag të ndeshjes me Luftëtarin. "Normalisht që është një ndeshje shumë e fortë dhe do të jemi në transfertë përballë një kundërshtari shumë cilësor. Po përgatitemi që të bëjmë më të mirën në këtë ndeshje dhe Lushnja të bëjë një paraqitje dinjitoze ditën e diel ndaj Luftëtarit. Me ardhjen e trajnerit Ilir Gjyla, pres të shfaq potencialin tim. Të shënoj edhe gola, pasi në pozicionin tim natyral nuk jam aktivizuar në asnjë ndeshje. Me ardhjen e profesor Gjylës pres të aktivizohem dhe të tregoj vlerat e mia si sulmues i dytë. Unë deri më tani kam luajtur mesfushor difensiv sepse nuk kemi pasur kontingjent dhe lojtar tjetër para mbrojtjes", është shprehur Papa. Alban Alushi