Shkurtaj në dilemë, Lika u kujton lojtarëve pikët e lëna
Nën drejtimin e trajnerit Hasan Lika, bluzinjtë nuk humbin kohë për të përgatitur strategjinë triumfuese ndaj Lushnjës. Me organikë të kompletuar, përjashtuar mungesën e Kristal Abazajt, i cili do t'i bashkohet Luftëtarit në stërvitjen e paradites së sotme, të gjithë të tjerët ishin të pranishëm nën urdhrat e stafit teknik. I kontaktuar nga "Panorama Sport", mesfushori me tipare sulmuese konfirmon pjesëmarrjen ditën e sotme me grupin, i gatshëm për të dhënë më të mirën në ndeshjen mbyllëse të fazës së tretë, atë me Lushnjën. TRAJNERI
Trajneri i gjirokastritëve, Hasan Lika, pas seancës së djeshme stërvitore për "Panorama Sport" u shpreh: "Në dukje është një ndeshje e lehtë ndaj një kundërshtari të ' dorëzuar' në letër. Përkundrazi, lushnjarët me trajnerin e ri, Ilir Gjyla, meritojnë respekt për mënyrën e të luajturit. Pavarësisht se rezultatet u kanë munguar, me Gjylën ata do të kërkojnë maksimumin ndaj nesh. Luajmë në fushën tonë dhe s'ka arsye për të gabuar. Kemi humbur pikë në transfertën e fundit me lushnjarët për meritë të tyre, por të dielën në fushë do të hyjmë për të vetmin objektiv, fitoren", përfundoi Lika. Kushtet e mira të motit ditën e djeshme nuk i kanë penguar bluzinjtë për të marrë gjithçka nga seanca e djeshme stërvitore. Vrapimet në pistën e "Fushës së Vjetër", shoqëruar me lojën me top të ndarë në katër grupe, kanë qenë pjesë e axhendës së stafit bluzi. Për Likën dhe jo vetëm mbetet për t'u parë nëse Shkurtaj do të jetë pjesë e formacionit antiLushnjë. Tomor Shehu